Danglamnate chak nan hman tum ila

Ministry of Tribal Affairs bultumin November 7-8, 2026 chhung khan Aizawl chhehvelah Seven Sisters' Cultural Meet buatsaih a ni. A ni khatnaah Tribal Research Institute, Kelsihah hman a ni a, a ni hnihnaah Zokhua, Falkawnah hman a ni thung.

Seven Sisters' Cultural Meet hi India hmarchhak state pariata chêng hnam hrang hrangte inkarah inhriat chianna leh inpawhna ṭha zawk a awm theihna tura buatsaih a ni a; thupui chu 'Unity in diversity: The Northeast symphony' tih a ni.

Cultural Meet hmingah 'seven sisters' tih ni mah se, India hmarchhaka state pariat - Arunachal Pradesh, Assam, Manipur, Meghalaya, Mizoram, Nagaland, Tripura leh Sikkim aṭangin mi eng emaw zat an tel a, mahni hnam lâm ṭheuh an entir a ni.

Ministry of Tribal Affairs bultuma Mizoram Art & Culture department-in hmarchhak state pariatte puala hnam nunphung inhriat tawnna tur Cultural Meet an buatsaih hi a lawmawm a; hmarchhak state-a chengte inṭhian ṭhatna leh inkungkaihna ṭha a awm phah ngei a beiseiawm.

India hi hnam hrang hrang chenhona ram a ni a, hmarchhak state pasarih bikah pawh hnam hrang hrang chêngin, ṭawng pawh chi hrang a tam hle. Hmarchhak biala chêng zinga tam tak chu tribal kan ni a, kan hmél, nunphung, zia leh duh zawngah pawh inanna tam tak kan nei a; chutihrualin, hnam hrang na nâ nâ chu, inan lohna tam tak a awm bawk.

Hnam hrang hrang, ṭawng chi hrang hmangtute chen khawmna kan nih avang hian inhriatthiam tawnna kan mamawh em em. Inhrethiam tawn tur chuan inhriatchian a ngai a, inhre chiang tur chuan kan inzir tawn a ngai. Inzir tawnna atan chuan hnam lâm inhriatsak tawn hi pawimawh ber zinga mi a ni.

Hmarchhak state mite hian kan danglamnate hi inhmuh thiam loh nan hmang loin, chakna atan hman tum zawk ila. Hmarchhak state mite hi kan inlungrual a, kan inpumkhat ṭhat phawt chuan kan chak lehzual thei ang a, Seven Sisters pawn lama mite lakah pawh kan zahawm zawk ngei ang.

Hmarchhak state-a hnam hrang hrangte kan inhriat chian zawk theih nan zing zawkin cultural event buatsaih theih ni se, chutiang zawng chuan sorkara thuneitute'n ngaihtuahna zau zawkin han han sêng zel teh se.