Mipui chhiahhlawh leh tirhkah minister
ZPM party-in November 9, 2026-a Aizawla chhung inkhawm an neihnaah Minister of State pakhatin thu sawiin, "Thuneihna min petu mipuite hi kan lalte an ni a, keini rorelna chelh mektute hi mipui chhiahhlawh, mipuite tirhkah kan ni," tiin a sawi. He thu hi a pawimawh a, sawi ang tak hi ni reng se chuan mipui náwlpuiin nuam an ti hlein a rinawm.
'Mipuite hi kan lalte an ni a, mipui chhiahhlawh kan ni' tih ang chi hi a rî a mawi a, ngaihthlak a nuam. Tun hma pawhin an lo sawi tawh ṭhin. Thil tihna dik tak a ni em tih erawh ngaihtuah tham a ni a; mipui tam zawk chuan thil nihna dik takah an ngai kher loin a rinawm a, thil nihna dik tak a nih lohna lai a awm bawk.
Mizoram hian minister tam tak a lo nei tawh; ṭhenkhat chu mipui tana inhawng tak, hmuh awlsam tak, biak nuam tak an ni a, chutiang zingah chuan tun hnaia 'rorelna chelh mektute hi mipui chhiahhlawh, mipuite tirhkah kan ni' titu pawh a tel a ni thei. Mahse, minister tam tak chu an ni lem lo, mipui tana inhawng lo tak tak an awm ṭhin.
'Mipuite hi kan lalte an ni a, roreltute hi mipui chhiahhlawh kan ni' tih ang chi ṭawngkam hi a mawi em em a, a taka chêtziaa lantir si loa sawi zel chi erawh a ni lo thei. Tun hnai maiah minister pakhatin a sawi leh tâk avang hian, tuna sorkar ding meka minister zawng zawng, Chief Minister thlengin a taka lantirtu an nih a ngai.
Minister-te hi ram chhunga lal dan indawtah sang viau mah se, mipui laka lal hrawt tur an ni lo a, intilal taka awm tur an ni lo. Mipui, mi rethei ber thlenga khawngaihna diltu, mipui vanga dinhmun sang taka awm an ni tih an hre reng tur a ni. Mirethei leh hnuaihnung zawka ngaihte tan pawh biakpawh ngamin awm zel rawh se.
Minister-te hi dinhmun sang taka awm an ni a, an nihna hian ken tel tam tak a nei a, mawhphurhna sang tak an nei a, mipui náwlpuiin an chan phak loh chanvo tam tak an nei bawk. Chungte chu mipui pawhin kan hriat a ṭul. Mipui chhiahhlawh an ni tih vanga basa ngam chi an ni lo a, hawihhâwm tak leh zah chunga biak leh dàwr tur an ni tih hriat tel a ṭha.