Passenger phur lirtheite thunun a ṭul

November 9, 2026 khan Aizawl Sustainable Urban Transport Project kalpui dan tur sawiho a ni. Ṭhutkhawm kaihruaitu Chief Minister-in khawpui tâwt tihziaawm nan public transport rintlak neih a pawimawh thu a sawi a, "Mipui tam zawkin uar zawka public transport an hman theih nan fai leh thianghlim, felfai taka enkawl, ṭha taka hunbi vawng chunga tlân theih a pawimawh," a ti.

Aizawl khawpui a tâwt em em a, CM-in a sawi angin, khawpui tâwt tihziaawm nan public transport ṭha leh rintlak neih a pawimawh em em. Mi tinin kan rina kan hman tlân theih lirthei changtlung zawk nei tura hmalak a ngai.

Aizawl kawngpui a tâwt chhan ber pakhat chu lirthei tlân chhuak tam lutuk a ni; mimal lirthei chhuak tam lutuk tiziaawma titlem turin public transport a ṭhat a ngai. Tuna Aizawla passenger vehicle kan neihte leh kan kalpui mek dan hi ennawn a ṭul a, kalphung thlak ngai a awm nual a, dan, thupek leh hriattirna te kenkawh ṭhat a ṭul bawk.

Aizawla city bus, taxi leh auto rickshaw chungchanga sorkar thu leh hlain zawm a hlawh lo. Taxi (four wheeler leh two wheeler)-te rate bithliah aia sang féin an tlân tlangpui a, city bus tana pick & drop system kalpui lah a hlawhtling thei lo. Hengte hian nghawng thui tak a nei a; lirthei hman man leh chuan man sang lutuk hi khuahkhirh ṭhat a ṭul tak zet.

Mi tam tak ngaihdanah chuan, ni tin pawisa tam tak sênga taxi hman ziah emaw, city bus-a chuana rei tak tak stand-a din emaw ai chuan, two wheeler tal neih mai mi tam takin an duh zawk. Two wheeler a tam phah em em a, lirthei tlân chhuak nasa takin a pun phah a, khawpui a tâwt zual phah a ni.

Aizawlah hian mipuiin mahni lirthei keng chhuak kher loa public transport-te an hman duh theih nan hmalak a ṭul. Taxi-te sorkar rate bituk ang taka an tlân theih nan awmze nei tak tak tura hmalak a ṭul a; city bus-te'n pick & drop system a taka an kalpui theih nan bawhzui a ṭul bawk.

Khawpui tâwt tihziaawm nan public transport rintlak neih a pawimawh thu CM-in a sawi hi a hlawhtlin theih nan sorkar hian a takin hma la ngei rawh se.