Hmasawn turin tawrh hmasak a ṭul

PHE Minister chuan November 10, 2026 zan khan Aizawl hmar lama chengte'n hnianghnâr zawka tui an hmuh theihna tura Aizawl Northern Feeder Pipeline Project hnathawh mek a hmunah a tlawh. Project hi SASCI Part-I hnuaiah cheng vbc 22.69 sênna tur a ni.

Aizawl Northern Feeder Pipeline Project hmalakna leh hnathawh mipui hmuh theiha langsâr tak chu kawngpui lài chhiaa pipe phûm a ni. Nikum khan pipe phûm ṭan a ni tawh a, tunlai hian Bawngkawn leh Durtlang Leitan inkarah pipe phûm mek a ni.

Pipe phûm mekin mipui nunphung nasa taka a tihbuai thu leh pawi an tih thu PHE Minister hian a sawi. Chutihrualin, hnathawh chu mipuiin hnianghnar zawka tui an dawn theihna tur a nih avangin, tuna harsatna awmte chu hrethiam turin mipui a ngen.

Hmasawnna hna thawh a nih hian, a bikin hna lian thamah phei chuan hna thawh laiin mipuiin a tawrh a ngaih chin a awm a; mipui tamna leh hmun lûn laiah hna thawh a nih phei chuan mipuiin harsatna an tâwk nasa zual ṭhin.

Hmun ṭhenkhatah chuan hna thawhna hmunah, 'Today's pain, tomorrow's gain' tih thu tàr a ni ṭhin a; 'Tuna harsatna kan tawhte hi nakina kan ṭhatna leh nawmna tur a ni,' tihna a ni ber ang. Hei hi a dik viau mai.

Tuna mipuiin awlsamna leh kan neih, hmasawnna rulrel (infrastructure) ṭha kan neihte hian siam a nih lai chuan mipui tan harsatna leh buaina eng eng emaw a thlen ṭhin a; mahse, siam zawh a nih meuh chuan mipuiin a hlâwkna kan tél ṭhin.

Aizawl hmar lam mipuiin hnianghnâr zawka tui an dawn theihna tura hmalakna kal mek hian mipui tan kawng hrang hrangin harsatna a thlen a ni thei a, mipuite'n kan nawmsak zawkna tur a ni tih hriaa kan tawrh hrâm hrâm a ngai a, hna thawktute tan harsatna siam loh a pawimawh.

Hetihrual hian, hna thawktute pawhin mipui tana harsatna siam tam lo thei ang bera hna an thawh a ngai a; hna an thawh loh karah chuan an sûlhnute mipui tana hnawksak lo thei ber turin an kalsan ve tur a ni. Mipui leh hna thawktute'n zài an ngaih thiam tawn a ṭul a ni ber.