Covid-19 vaccine

Khawvel tibuaitu Covid-19 laka invenna damdawi (vaccine) chu India sorkarin a pe ṭan ta a, Mizoramah pawh Covid-19 donaa hmalatute pek ṭan an ni. He vaccine hi hmanhmawh taka siam a ni a, vaccine dangte angin enchhinna hun a rei tawk lo a, insawi ṭhaihna leh a him tawk loa ngaihna sawi a tam hle. Mizoram Health minister chuan, "Vaccine hi a ṭha tawkah i ngai phawt ang u," a ti a. India sorkarin mipuite chhiatna tura hma an lak loh tur thu a sawi a, damdawite pawh a ngeih leh ngeih lo an awm theih thu a sawi. 

Hripui leng vangin kan buai a, kan nghah­­hlelh ber pakhat chu hri leng danna (vaccine) an siam chhuah hun a ni. Chu hun chu kan thleng ta a, khawvel hmun dangte ang bawkin India pawhin vaccine a siam chhuak ta a; nimahsela a ṭhat tawk lohna leh a him tawk lohna lam insawi ṭhaihna a tam hle. 

Health minister sawi ang hian India sorkar hian mipuite chhiatna tur chuan hma a la hauh lo ang tih a chiang a, khawi khawiah emaw he vaccine ṭhatlohna lam an lo sawi a nih pawhin, thuneitu lamin a him tawka an ngaih leh hripui laka kan himna tura ruahmanna an siam hi chu finfiahna nei lem lo chuan sel loh phawt a ṭha ber ang. 

Mihringah a thawh dan a inang lo mai thei a, mi tam ber tana damna leh himna tura mithiamte'n an duana an siam chhuah hi anni aia thiam lo zawkin rinthu nena lo sawi pawr a, a hre lo lehchhawng zawkte sawi ṭhaih zawnga lo ṭawng phei chu tih loh atan a ṭha hle. 

Covid-19 avanga kan buai leh mangan em em laia hri leng laka kan himna tura vaccine siam chhuah a ni ta hi a lawmawm a, India sorkarin Mizoramah rang taka a rawn thlen thei hi a lawmawm hle a ni.