CM leh Minister ten sawifiah rawh se
Congress party-a Vigilance department chuan Chief Minister leh Land Resources, Soil and Water Conservation (LRSWC) Minister te chu Chief Minister CM Rubber Mission hnuaiah Mamit district-a Chuhvel rama ṭhelrêt huan nei ve-ah leh an huan laihna atan Rs 18,90,000 hmangah an puh.
MPCC Vigilance department hotute'n November 12, 2026 khan Aizawl Press Club-a press conference an neihah an Chairman chuan, "Chuhvel mipuite'n an sawi danin, an ram chhungah kan CM Pu Lalduhoma leh Soil & Water Conservation minister Pu Lalthansanga ten an ram chhungah CM Rubber Mission project aṭangin rubber huan an nei ve tih an sawi," tiin a sawi a ni.
Congress party tarlan danin, Chuhvel khuaah CM Rubber Mission hmasaah mi 74 thlan an ni a, ṭhelrêt chingtute hnena a hungna tur Rs 63,00,000 pek tawh chu la lêtin, CM leh LRSWC Minister te huan kawng laih nan Rs 18,90,000 an hmang a ni.
MPCC hotute'n CM leh LRSWC Minister an puhna hi enliam mai loa ngaih thutak a ṭul. Inpuh hmingchhiat tumna leh politics-a inbeihna nge, thil dik tak zawk, tih hi tihchian ngei a ngai a; tuna an inpuhnaah ringawt hi chuan a dik leh dik loh hriat a harsa hle.
MPCC Vigilance Chairman-in a sawi chu, "Chuhvel mipuite'n an sawi danin..." tih a ni. Chuhvel mipui sawi dan ringawt hi chu thil lian tham taka inpuh hmingchhiatna ṭan chhan atan chuan a tling tâwk lo thei. Hei aia chiang zawk, dan rorelnaa dinpui tlak tur khawpa chiang zawk a awm a ngai.
Congress Vigilance-in an puhna hi thil tenau a ni lo a, Chief Minister leh LRSWC Minister te pawhin an ngaih thutak a ṭul. An ngawi liam mai a nih chuan Congress party-in an puhna hi a dikah mi tam takin an ngaiin a rinawm.
Chuvangin, CM leh Minister hian thil awmzia an sawifiah a ṭul. Puh an nihna hi thu dik lo, dâwta inpuhna a nih chuan chiang taka sawifiahin, na takin an chháng lêt ngam tur a ni. A lehlamah, puh an nih ang hian, kut hnathawktute chanpual tur CM leh minister meuhin an lo chang ve tak tak a nih erawh chuan a zahthlak hle ang a, Mizoram mipui hnena ngaihdam dil hialna tham a ni ang.