Raltlante khuahkhirh ṭhat a ṭul
Dawrpui Local Council leh YMA ṭang dun chuan November 14, 2026 khan an venga New Market leh Zion Street vela thil zuara kal kual mi 50 an ko khawm a, dan loa sumdawng an hmu chhuak nual.
Aizawl Bazarpui leh a chhehvela thil zuara kal khawm ṭhin Dawrpui LC leh YMA ten an koh khawm mi 50 zingah India rama voter identity card nei mi 24 an awm laiin, a tam zawk mi 26-in an nei lo a, chung mi 26-te chuan Mizorama sumdawn phalna an nei loa sawi a ni.
Dawrpui veng hi sumdawnna hmunpui a nih angin mi chi tin chi tang an tam a, Mizoramah chuan hnam hrang inpawlhsawp berna hmun a ni hialin a rinawm. Hei vang hian Dawrpui khawtlang hruaitute hmalakna hi a àwm a, dan anga sumdawng theite chauhin sumdawnna an kalpui theih nan khauh taka an kal zel pawh a ṭha ang.
Ṭhenawm ram Myanmar tualchhung buaina avangin mi tam tak Mizoramah an rawn lut a, a tam ber chu Zo hnahthlak an ni. Burma tualchhung buaina vanga rawn lutte hi raltlan tia sawi an ni tlangpui. Chutihrualin, tualchhung buaina a awm hma pawhin Burma aṭanga rawn lut mi tam tak an awm tho a, chung zingah chuan sumdawng pawh tam tak an awma sawi a ni ṭhin.
Myanmar aṭanga rawn lut zinga a tam ber hi Zo hnahthlakte ni mah se, danah chuan ram dang mi an ni tho a; hei vang hian an chungah dan ang taka kal theih a ṭha ber ang. Burma aṭanga rawn lutte laka dan ang taka kal turin sorkarin chak zawk leh khauh lehzuala hma a lak a ṭul a, VC/LC-te leh YMA-te nen an ṭanho thiam a pawimawh.
Raltlan kan tihte hi sorkar laipui hmalaknain biometric enrolment hmanga chhinchhiah an ni a, thuneitute an chhinchhiah zo tawhin a hriat. Biometric enrolment hmanga chhinchhiah piah lamah hian, raltlante Mizorama an khawsak zel dan leh an laka khuahkhirhnate lekkawh a nih dan hi a pawimawh lai a ni.
Burma aṭanga rawn lutte hi kan Zo-puite an nih tlangpui avangin thiam taka enkawl a ṭul a, an awm dan leh chêt vel danah tun aia mumal zawka khuahkhirhna leklawh a ṭul e.