MPSC-ah awmze nei thama hmalak a ṭul

Mizoram Public Service Commission-in tun hnaia FCSCA department-a storekeeper tur lakna result a tihchhuahah dik lo lian tak a awm a, chuvang chuan mi tam takin buaina leh harsatna an tawh phah.

MPSC hian tun hnai kum hnih/khat kal ta chhungin tihsual an nei fo a, result tihdanglam pawh a awm nual tawh. Chuvang chuan zirlai pawlte'n hma an la a, MPSC-a thawkte pisa kai tur pawh an lo dang tawh a; mi tam takin na tak takin MPSC an dem a ni.

An tihsual aṭanga fimkhur theihpatawpa fimkhur tur an nih laia tun hnaia MPSC-in tihsual lian tak mai an nei leh ta hi a pawi a, a zahthlak a, a mualphothlak hle. Hei vang hian MZP chuan MPSC Secretary leh Controller of Examination te chu thil dik lo awma mawhphurtu berah ngaiin November 20, 2026 ral hmaa thlak turin sorkar an phût a; MSU-in November 19, 2026 ral hmaa báng turin MPSC Chairman an phût bawk.

Zirlai pawlte'n MPSC-a hotute báng tura an phût leh, thlâk tura sorkar an phût hi a àwm em em a; hetiang hian hma la lo ta se, zirlai pawlte hi an demawm hial zawkin a rinawm. Zirlai pawlte'n thil dik lo thlen chhana mawhphurtua an ngaihte hian eng ang takin nge mawh an phurh tih hriat chian ni lo mah se, mawhphurhna an nei lo thei lo a, chuvangin, sorkar leh MPSC hotute hi ngun taka an inngaihtuah a ṭul.

MPSC dinhmun hrim hrim hi sorkar hian chîk lehzuala a enfiah a ngai niin a lang. MPSC hian an zawh loh khawp hna, tih tur leh mawhphurhna an nei a ni maithei a, hei tak hi sorkarin a enfiah ṭul lai a ni.

MPSC-in an khawih zingah an khawih ngei ngei ngai lem lo a awm a nih chuan, chungte chu mi dang khawih tura dah theih ni se a ṭha zawkin a rinawm. Thawktu mai bakah, hmunhma leh bungrua leh khawl thilah tihchangtluna tihchak lehzual a ṭul a ni thei bawk.

Sorkar hian chîk lehzualin enfiah se, tihsual lian tak tak an neih ṭhin chhan dik tak uluk lehzualin chhui se. MPSC hna leh result tihchhuahah thil dik lo a thlen tawh loh nan sorkar hian awmze nei ngei turin hma la rawh se.