Rêl station-te ṭha lehzuala vil a ṭul

Central YMA hnuaia Vigilance Sub-Committee leh YMA branch pali aṭanga thawk chhuakte chuan November 16, 2026 tlai leh zan khan rêl hmanga hnam dangte hnena Inner Line Permit (ILP) pek chhuah dan an endik a, ILP nei lo hnam dang 17 an man.

CYMA Vigilance Sub-Committee bultuma YMA hnatlang hian Mizoram páwn aṭanga rél hmanga rawn lut, Sairang rêl chawlhhmun thleng loa Mualkhang station-a chhuk ru, ILP nei lo hnam dang 17 nangchingin an man a ni. Hetianga dan loa hnam dang Mizorama rawn lutte an man chhuak hi a lawmawm.

Rêl hmanga hnam dang rawn lut, ILP nei lo mi 17 lai YMA-in an man hian ngaihtuah a tithui hle. Hemi hma pawh hian Sairang thleng loa station hmasa zawk lama chhuk a, ILP tel loa Mizorama rawn lut an awm ṭeuh tawh maithei. Sorkar thuneitute'n khauh zawka hma an lak a ṭulzia a tichiang.

Bairabi leh Sairang tel loin a inkarah rêl chawlhhmun pathum a awm a, chungte chu thuneitute'n uluk zawka an vil a ṭul. Sairang thleng loa Hortoki, Kawnpui leh Mualkhang station-ahte rel aṭanga chhuk theih a ni a, ILP pumpelh nan hnam dangte an chhuk theih avangin, heng station-te hi thuneitute'n uluk zawla an vil a ngai.

Hortoki, Kawnpui leh Mualkhang station-ahte hian state páwn aṭanga hnam dang rawn lutte enfiahna tur leh ILP pek chhuahna tur ṭha leh changtlung zawk a awm a ngaih bakah, mamawh tâwk thawktu dah a ṭul. Hnam dangte awlsam taka an luh-chhuah theih loh nan ṭha zawka hung a ṭul bawk. Bairabi leh Sairang inkara station-te hi sorkar hian ngaihthah loin, uluk zawk, ngawrh zawk leh khauh zawkin vil rawh se.

CYMA hnuaia Vigilance Sub-Committee hian November 16 khan Khamrang leh Mualkhang chhehvela eirawngbawlna gas tihchingpen awm ṭhin nia sawi a hmunah an enfiah nghal bawk a; gas tichingpen ṭhinte chu an ûm zui zel dawn thu an sawi.

CYMA Vigilance Sub-Committee-in ram leh hnam himna tura an mawhphurhna pawh ni loa hma an la hi a lawmawm a, thâ thlah loin theihtawp chhuahin hma la zel se. Chutihrualin, dan an bawhchhiat loh nan leh, mihring infiriamna leh inhnuaichhiahna a awm loh nan, human right an bawhchhiat loh nan an fimkhur a ngai.