Sainik School kan ngaihven a ṭul
Sainik School, Chhingchhip hotute'n November 14, 2026 khan Aizawl Press Club-ah thuthar thehdarhtute kâwmin, an sikulah Mizoramin quota a neih an luah khah zawh loh thu an sawi a, Sainik School-ah fate luhtir turin Mizo nu leh pate an sáwm.
Mizorama Sainik School-ah hian state-in quota a neih zat Mizorama chengte'n an luah khat zo lo nasaa sawi a ni a, Chakma zirlai an tam tawh viaua sawi a ni bawk.
Chhingchhip Sainik School hotute'n Aizawlah press conference hial koa Mizo zirlaite lut tura an duh thu leh, an fate luhtir tura nu leh pate an sàwm ta hial hian ngaihtuah a tithui viau; Mizote duhsakna rilru nen ṭhahnem an ngai viau niin a lang.
Sainik School-a lut tura paltlang ngai AISSEE hi zirlai nazawng tan a harsa a nih pawhin, paltlang thei khawpa theihna nei Mizo zirlai zingah tam tak an awm ang. Fee a tlem lem lo a, mahse, senso ang hmuh lêt leh theih deuh vek a ni. Entrance exam leh fee hi huphurhawmin lang mah se, tum tak tak tan harsatna lian a tling lo ang.
Sainik School nena inzawm tlat chu sipai a ni a, hei hi mi tam tak rilrua awm a ni. Sipai officer nih theihna kawng awlsam zawk a ni hi a ṭhatna a ni a; sorkar hnaa luh a harsat tawh em em karah sipai hi hna ṭha tak a nih avangin Mizote'n kan bawh thar a pawimawh.
Mizoramah sipai hmun a awm lo a, sipaite Mizoramah an awm lo tlangpui a; Sainik School-a zirlaite pawh mahni in lum chhuahsana a hmuna awm chilh a ngai. Hengte hi huphurh mai loin, a ṭhatna thlir chunga fate kawng atan thlan ngam a ngai.
Tunlai ṭhalaite leh naupangte an no (soft) ta lutuka sawi a ni fo a, a dikna lai a awm ang; nu leh pate pawh fate chungchangah an no ta viau ve thei bawk. Kan no loh tlàn a ngai a, nu leh pate'n fate an 'soft' loh nan ṭan an lak a ngai.
Sainik School hmanga Mizoram tana kawng ṭha inhawng hi Mizoramin a chhawr ṭanglai lehzual theih nan nu leh pate'n fate dah hreh lo thei se a duhawm hle. Chhingchhip Sainik School-a Mizoram quota hi Mizote ngeiin kan hnawhkhah zel theih nan ṭan lak tlân a ngai e.