Sakhuana, Kristianna leh politics
MPCC Media hotute chuan November 19, 2026 khan press conference neiin, Chief Minister chu Kristiante ni serh Pathianni palzamah puhin, vanduaithlak an tih thu a sawi.
Prime Minister chuan November 15, 2026 Pathianni khan Ropuiliani Tribal Freedom Fighters Museum leh Zawlnuama EMRS te biakhmuhna kaltlangin a hawng a, a rualin state danga thil eng emaw zat a hawng tel. PM-in thil a hawnnaah hian Mizoram CM pawhin Ropuiliani Museum huam chhunga Ropuiliani lim a hawng a ni.
Congress party-te'n CM an dem hi a àwm thei a, tunlai khawvel thlirin a àwm lo thei bawk. Mizote hi Pathianni serh danah tun hma chuan kan khawng viau a, tunah erawh chuan a ni tawh lêm lo. Thil inthlak danglam zelah Pathiannia thil tih ngai te, zin chhuah ngaihna te, pawipang tam tak a awm a, chungte chu kan ti hreh tawh lo tlangpui - kohhrana rawngbawltute pawh an bâng chuang lo.
CM-in Ropuiliani lim a lo hawng kha a àwmna lai a awm thei a, lo hawn ve kher a ṭul loah a ngaih theih bawk. Ropuiliani lim hi Ropuiliani Tribal Freedom Fighters Museum chhunga mi a ni a, Museum chhunga thil dang eng emaw zat nen PM-in a hawn zingah khan a tel tho àwm e; CM-in a lo hawng ve kha chu thil tih ve neih duhna vang a nih a rinawm. PM-in a hawn laia hun lo hman erawh sorkar anga tih ngei tur a ni ang.
Kristianna leh sakhaw dang kaihhnawih thilte hi Mizorama political party-te hian politics khelh nan leh party dangte beih nan an leklam hle, kohhran ai mahin an duh fîr emaw tih mai tur a nih cháng a awm. Politics khelhna atan kan la hmang zel dawn pawh a ni maithei.
Pathian thu leh Kristianna hi politics khelh nan kan hmang a nih pawhin, khingpuite demna atan chauh ni lo se. Kristian, Pathian ringtu kan nih ang ngeia dik taka thil tih phahna atan te, Pathian duh dan anga politics khelhna atan leh, thuneihna changtu kan nih pawha Pathian duh dan leh a lawm tlak ngei tura ram rorelna kalpuina atan kan hman zawk a ngai.
Pathianni hi a tuate pawhin a theih chinah chuan serh zel ila, pumpelh theihte chu ni danga tihah khêk ila; politics kan khelh danah te, ram rorelna kan kalpui danah te hian Pathian lal ber se, ringtu kan nihna a taka lantir a ngai e.