Roreltute laka mipuite beisei

Kumin kumthar chu ram rorel khawl thar nen kum bul kan ṭan dawn a, hetiang hi kum nga danah kan nei ṭhin a, mipuite pawhin eng emaw tak a thlen ringin kumthar hi kan hmuak ṭhin a ni. 

MNF kaihhruai sorkar thar lakah hian mipuiten beiseina inkawlkalh tak tak kan nei tih a hmuh theih. Chief Minister te, Deputy Chief Minister te, senior cabinet minister, tawnhriat nei ṭha tak tak an awm nual a, chutih rualin council of minister zingah hmel thar leh ṭhalai an tel tam ber ṭum a ni awm e. Hei vang hian ṭhalaite pawhin beiseina sang tak an nei niin a lang. 

Congress sorkar liam taah khan, council of minister zinga an ṭhalaite kha an ring tawk thiamin, hmatheh atan pawh an chhawr ṭangkai thiam hle. An chawlh tak hnuah pawh Congress sorkar laia an sulhnu ṭha, sawi zui hlawhte chu council of minister zinga an ṭhalaite sulhnu deuh vek kha a ni. Kan sorkar thar hi sorkar ngelnghet tawk taka ngaih a ni a, an duh phawt chuan huaisen taka hna thawk tham pawh an ni. Term khat hman zawh huna term dang pek leh tlak an ni dawn em tih chu an taimak leh thawhrim danin a rawn hril ang chu. 

Tun ṭum hi ram rorel khawla eptu member tlin tam ber ṭum a ni hial awm e. Chu bakah eptu member-te laka mipuiten beisei an neih san ber ṭum pawh a nih a rinawm bawk. Ram hmasawn apiangah eptu party-ten an thawhhlawk a, kawngro an su ṭhin. Eptu dinhmun aṭangin hlawk takin mipui rawng a bawl theih a ni. 

Hna thawk thei lo tura sorkar chawh­buai ringawt hi eptu chak tehfung a ni hran lo a, sorkar kal sual tur veng a, khalhngil hna huaisen leh taima taka thawh hi mipui beisei dan tur a ni ang. Eptu member-te cheziaah mipui mit a fu nasa hle dawn a, thuneihna pek chakawm khawpa an taimak a, an thawhrim phawt chuan, mipuiten hun hmasa berah thuneihna pawh an pe ve mai ang.