The Citizenship (Amendment) Bill, 2016 leh Mizoram
North East Student Organisation (NESO) bul tumin tun hnai khan India hmarchhak state hrang hrangah The Citizenship (Amendment) Bill, 2016 duh loh lantirna leh dodalna lantirna atan total bandh huaihawt a ni a; Mizoramah pawh MZP-in total bandh hi kalpuiin mipuiin an thlawp ṭha hle.
Mizorama sorkarna vawnfung chelh mektu MNF president chuan The Citizenship (Amendment) Bill, 2016 hi an duh loh thu leh total bandh neih pawh hi man thlawp tlat thu a sawi. India hmarchhaka political party lian tak pakhat National People’s Party president leh Meghalaya chief minister ni bawk chuan he dan thar hi an thlawp theih loh thu leh BJP kaihhruai NDA-in Lok Sabha-a a pu luta an pass a nih chuan BJP kaihhruai NDA leh NEDA aṭanga an inhnuhdawh tur thu a sawi tawh. Assam-ah chuan BJP thurualpui Asom Gana Parishad (AGP) chuan BJP nen an thawhdunna an tihtawp thu an puang tawh bawk.
Citizenship (Amendment) Bill, 2016 hi India hmar chhaka cheng hnam tlem zawkte tan hian a hlauhawm hle a, state dang chuan he danin a nghawng turte hi hre chiang sain na takin an dem a ni. Mizoramah pawh zirlai pawl mai ni loin tlawmngai pawl dangte pawhin he dan hi a ṭha an tih loh thu an lo sawi chhuak tawh a, political party hrang hrangte pawhin an duh loh thu an puang tawh.
Mizo hnam leh sakhaw tana hnawksak thei tur, kan dam khaw chhuahna dip theitu tur dan Lok Sabha-a pu luttu party chu kan hre ṭheuh a, BJP leh a thawhpui NDA-te an ni. Hei vang hian Mizorama NDA lam ṭang nih leh an kaihhruai NEDA-a lo tel chhunzawm zel hi a inhmeh ber lo a, MNF pawh hian Mizo leh Mizoram tan a ni tih hriain NDA leh NEDA lama an inthunzawmna lam hi titawp ngam se mipui thlawp an hlawh lehzual ngei ang.