‘Hnam Hnatlang’ kohna tling

Lok Sabha chuan January 8, Thawhlehni khan The Citizenship (Amendment) Bill, 2016 chu a pass ta a, Rajya Sabha lam a paltlang leh thei a nih chuan ‘act’ niin dan thar a ni tawh ang. He dan hi hman a nih chuan Pakistan, Afghanistan leh Bangladesh aṭanga India rama pêm, Muslim sakhaw zuitu ni lote chu India khua leh tui an ni thei dawn tihna a ni. 

The Citizenship (Amendment) Bill, 2016 hi Mizorama tlawmngai pawlte pawhin vawi tam an lo ngaihtuah tawh a, a hlauhawmzia leh a tuartu tur kan nih thute pawh an lo au chhuahpui tawh. Mizoram chang ni loin hmarchhak state dangte pawhin he dan thar siam tumna hi na takin an dodal a, Assam, Meghalaya, Tripura leh state dangahte pawh duh lohna na taka kalpui mek a ni. 

Mizoramah hian The Citizenship (Amendment) Bill, 2016 hian sawi a hlawh tawk loin ngaihven a hlawh vak lo emaw tih tur a ni a, zirlai pawlte leh tlawmngai pawla inhmang deuhte ngaihtuah tawkah kan dah palh mai ang tih a hlauhawm. He dan hi a taka hman a nih chuan Mizoram hi a tuar nasa ber zingah kan tel thei a, kan Bangladesh aṭanga lo lutte hi India khua leh tuia chhiar an nih rualin kan ram hi a him lo nghal a, kan sakhua thlengin a nghawng ngei ang. 

Mizo mipuite kan ṭhanharh a, he hnam leh sakhaw thil pawimawh tak mai hi tun aia kan ngaihsak a, kan ngaihven a hun ta. Politics thil mai a ni lo a, kan ram, kan hnam kan sakhaw tana pawi thei a ni tih hriain a ṭul a nih chuan a dodal turin ‘Hnam Hnatlang’ koh hial a ṭha ang.