Journalist pension

Mizoram Journalists' Association (MJA) member-te leh Information & Public Relation (IPR) department official-te chuan tun hnai hian press tour neiin Puducherry an fang mek a; Puducherry sorkar chuan an journalist zinga kum 20 thawk tawh, kum 58 tlingte chu sorkarin pension a pe ṭhin a, journalist-te'n hamṭhatna hrang hrang sorkar aṭangin an dawng bawk. 

Journalist-te hi an pawimawhna sawi lan ṭhin ni mah se hamṭhatna pek kawngah hian sorkar tan pawh tih thiam a harsain puih tawk dan thiam hi a harsa hlein a rinawm a. Sorkar hnathawkte anga en theih an ni lo a, chutihlaiin sorkar thawhpuitu pawimawh tak an nih ve si avang hian sorkar tan pawh an hmasawnna leh hamṭhatna tur ngaihtuah hi chu thil tihâwm tak a ni. 

State hrang hrangin an phak tawk, an tlin tawk leh an thiam ang tawkin journalist-te hamṭhatna an siamsak a, Mizoram sorkar pawhin a ngaihtuah hle. Mizoramah chuan journalist-te damloh nikhuaa an inenkawlna senso phuhruk dan siam a ni tawh a, an thihin sorkarin a ral bawk ṭhin. Press tour-te siamin kawng tam takah sorkarin a ngaihsakzia a lantir ṭhin. 

Hetihlai hian Mizoram journalist-te'n hun rei tak chhung an buaipui leh an ngen chu pension siamsak hi a ni a, sorkarin a la tihlawhtling thei chiah lo. Private firm ṭhenkhat pawh hian an hnathawkte pension scheme an siamsak thei tawh a, a tihdan kalphung hrang hrang awmin mahni tlin tawka pension scheme siam dan hi chu a awm. Mizoram sorkar hian a ngaih pawimawh zawngah chuan sum a dah thei reng tih kan hmu tawh a, journalist-te pension pek dan pawh hi a ngai pawimawh a nih chuan a ti thei ngeiin a rinawm.