Hotel enkawltute fimkhurna tur

Aizawl SP office chuan tun hnai khan 'Awareness programme on drugs & arms traffickers/ smugglers for hotel owner/ manager’ an buatsaih a; he huna thusawitu Aizawl SP chuan, Aizawlah zin veivâk, mi chi hrang hrang an tam tawh avangin khualbûk enkawltute kawng engkimah an fimkhur a ṭul tih hre reng turin a chah.

Mizoramah khual­zin an pung ve zel a, sumdawng leh sorkar hna pawimawha lo zin an awm a, Mizoram rawn tlawh tur hrim hrima lo zinte bakah mi ṭha lote pawh an lo zin ve bawk ṭhin. Hei vang tak hian khualzinte lo dawltu lam hi an fimkhur a ngai khawp mai. 

Mizoramah hian ṭhenawm state aṭanga mikhual lo lutte mai ni lo ṭhenawm ram, Myanmar leh Bangladesh aṭangtein mikhual an lo lut ṭhin bawk a. Heng mite hi dan ang taka lo lut an nih leh nih loh an finfiah hmasak a ṭha hle. Tunlai khawvelah chuan ID proof hi phût ngei tur a ni a, chiang taka mikhualte chhinchhiah an nih loh chuan misualte tan remchang a inhawng fo ṭhin. 

Misualte laka fimkhur a ṭul rual hian khualzin dawn­sawn dan hrim hrimah pawh kan khualbuk neitute hian ṭan an lak zel an pawimawh a, faina leh thianghlimna kawngahte leh hawih­hawmna lantir thlengin Mizoram tana darthlalang an nih avangin thawktute pawh an infuih ṭhat hle a ngai a ni. 

Khualzin chi hrang hrang kan neih belh zel dawn a, Mizoram khualzin dawng­sawngute’n fimkhur leh hawih­hawm taka khualzin dawn­sawn i zir zel ang u.