Inthlan dawn thutiam

MPC party ṭhalaite chuan thuchhuah siamin, Aizawl Municipal Corporation(AMC)-a sorkarna chelhtu MNF party-in kum 2015-a AMC inthlan dawna Aizawla free wifi pek an tiam chu tun thlengin awmze neia tihhlawhtlin a la nih loh thu an tarlang a, "Vawiin thlenga a rim a râ hriata hmuh tur a awm leh ta si lo hian AMC mayor Pu Lalhmingthanga leh a hote an thutiama an din zawh lohzia a tilang chiang hle a ni," an ti. 

Inthlan dawnah political party hrang hrangte an thil tih tum ṭha tak tak hmangin an inzuar ṭhin a, vote hmuh an duh vanga inzuar an nih piah lamah ram tana hnathawh an tum dan puan chhuahna hun a ni. Mizoram mipuite pawhin inthlan dawna political party-te manifesto hi kan dah pawimawh tawhin kan vote danah pawh chu mi hre reng chuan kan vote niin a ngaih theih ṭan ta. 

State inthlan result thlir ila, political party-te’n an tih tur an zawrh hi mipuiin kan chik ta hle niin a lang a, an tih loh tur leh tihtawp an tumte thlengin kan pawmpui zawng a nih chuan vote hmangin kan thlawpna kan lantir ve ṭan mek niin a lang a, hmasawnna lawmawm tak a ni. 

Hei vang tak hian inthlan dawna thutiam hi a pawimawh a. AMC inthlan dawna MNF lamin free wifi an tiam ang an tihlawhtling thei ta lote hi a pawi a ni mai lo a, mipui zahlohna ang hialah a ngaih theih ang. Free wifi pek an tumna kawngah harsatna an tawk a ni ngei ang a, chu tal chu mipui hma­ah huaisen takin puang se a zahawm ang. 

State inthlanah pawh district pathum tihpuitlin te, zu zawrh tihtawpte pawh intiamin an tihlawhtling nghal mai a; chutih­laiin cheng nuai thum sem, traffic jam awm lohna khawpuia Aizawl siam, kawng chhawng siamte pawh an tihhlawhtlin ngei mipuiin an phût tlat dawn a ni.