LSC fel fai lo leh hnathawktute

Mizoram Survey and Land Record Service Association (MIS­LARSA) General Body Meeting, Training cum Workshop hmanpuitu LRS minister Lal­ruatkima chuan, LSC lem leh felfai lo tam ta lutuk chu mang­anthlak a tih thu a sawi. 

Mizorama LSC lem leh mumal lo tam lutuk hi a buaithlak a, mi tam takin sum leh pai an chân phah chhan a ni a, mi ṭhenkhatin dan lo leh midang bum chunga sum an siamna a ni tel bawk. He thilah hian misual mi bum hmang an inrawlh chang awm bawk ṭhin mah se, LSC lem leh LSC felfai lo tam taka mawh­phurtu hi chu LRS department-a thawktute hi an ni ve bawk niin a lang. 

LRS-a hnathawktute hi LSC lem man chhuak thei ber tur an ni a, ram buai chinchang hre ber tur leh LSC felfai lo pawh zawng chhuaka siam ṭha thei tur ber an ni. Chutihlaiin anmahni ngei pawh an inrawlhna LSC felfai lo a awm leh nawlh ṭhin hi a pawi a, hemi kawngah hian department lam hian ṭan la thar thei se, anni lamin khauh taka thil an kalpuia an chungkua an inrel fel ṭhat chuan LSC vanga buaina tam tak hi chu a chinfel theih ngei ang. 

Chutih rual chuan LRS-a hnathawktute pawh tibuai a, midang bum reng renga khawsa misual eng emaw zat an awm ve bawk a, mi bum hmang chinchang hre tak an awm phei chuan buaina chinfel hi a harsa zual ṭhin. Ramri leh ram neih dana thubuai hi a nghawng a na a, pawisa fai pawha cheng nuai bite a nih piah lam­ah chhungkaw din­chhuahna leh tlak chhiatna hial pawh hril theitu a ni. 

LRS-a hnathawktu hmun hrang hrang inhmun leh ram nei thei tak, an hlawh phu loa hausa leh he lama rinhlelh kaite an awm nawk zel chuan LSC buaina hi a fel lawk lo ang tih a hlauhawm. Chutihlaiin LSC lem leh LSC fel lo hi vawi leh khata chinfel theih a ni dawn hauh lo a, chutih rual chuan LRS department lamin tih takzeta ṭan an lak chuan LSC buai chinfel kawnga hmalakna hian awmzia a nei thei ngei ang.