Lirthei khalh fimkhur leh dan

Tunlai hian Mizoram pumah Road Safety Month hman mek a ni a, February 17 thleng a awh ang. Kumina thupui chu 'Fimkhur la, nun humhim rawh,' tih a ni. 

Lirthei khalh fimkhur tura inchah leh infuihna hun a lo thlen hian, driver-te hian anmahni pual a ni tih hi an  pawm a ṭha a, tute emaw puala buatsaih bik anga ngaih hi a awl hle. Lirthei khalhtu zawng zawng pual a ni a, eizawnna atana lirthei khalh ṭhin kher ni lo pawh lirthei khalh ṭhin zawng zawngin an pual a ni tih an pawm a ngai. 

Mizorama kan kawngpui dinhmun en hian fimkhur a ngai zual emaw tih tur a ni. Kawng kawi ulh tak tak a tam a, lirthei a tamin an tlan chak thei tawh si a, chetsualna pumpelh tura inzirtir thar kan mamawh tlang hle. Hei bakah hian lirthei chet sual chhan lian tak chu rui chunga khalh vang a ni a, hengte hi inzirtir sawt lo tak anga lang ni mah se thuneitu lam tan tha thlah loa zirtirna hi kalpui reng a ṭul dawn a ni. 

Kangmei laka fimkhur tura inzirtirnate leh lirthei khalh fimkhur tura inzirtirnate hi mi tam tak chuan vanduaina an la tawh ve loh avangin anmahni kawk lo deuhah an ngai ta ṭhin a; nimahsela in tikang ṭhin an awm bik chuang lo ang bawkin 'lirtheia che sual ṭhin' han tih bik tur an awm lo a, fimkhur loh leh van­duai avanga mahni chunga thleng thei a ni tih hriaa  inzirtirna hi kan dawn­sawn thiam a ṭha hle. 

Lirthei khalh ṭhin zawng zawngin he hun bikah hian fimkhur a ṭul thu hi zir chhuak thar ila, 'keima pual a ni' tia kan pawm thiam chuan he Road Safety Month hi keimahni ṭheuhah a hlawhtling dawn tihna a ni.