Mipui chhawk zangkhai

Council of Ministers tun hnaia inhmukhawm chuan Mizoram sorkarin thisen sawngbawlna man, blood processing fee a lak chu tihtawp a rel a, hman nghal tura tih a ni. Health minister chuan, "Mipuite chhâwk zângkhai kan duh vanga blood processing fee lak ṭhin titawp kan ni," a ti. 

Thisen dawngtute hnen aṭanga blood processing fee, unit khatah Rs. 550 zel lak hi State Blood Transfusion Council (SBTC) chuan kum 2014 khan a rêl a; khatihlaia Health minister khan sorkar laipui duh dan angin, thisen dawngtute ṭangin processing fee lâk a nih dawn thu hi a lo sawi chhuak tawh a ni. 

Tunah sorkar thar a ding a, mipuite chhawk zangkhai thei turin ṭan an la nghal hi a lawmawm hle mai a, hei hian thil dangah nghawng nei zui lo thei se a lawmawm khawp ang. Mizoram sorkar hi sum indaih lo reng renga kal tawh a ni a, sorkar hnathawk hlawh tihsan a nih hnu phei hi chuan sum lama harsatna hi a pung zel ang tih a hlauhawm a, chutihlaia nghawng nei lian tak tur thutlukna an siam hi sorkar hian sum hmuhna tur dang a hria a nih ngei hmel. 

Sorkar hi thutlukna siamtu a ni a, pawisa a awm lo an tih pawhin an duhna lamah chuan an dah thei zel tho a; tunah pawh hian thisen sawngbawlna man tihtawp a nih tak avang hian sorkar hi lo hek deuh pawh ni se mipui lamin a hlawkna an tel dawn thung a, chumi nghawng zel sum leh pai dinhmun chinfel chu sorkar mawh a ni tawh ang. 

He thutlukna an siam theih chhan hi sum hmuhna tur dang a awm ni ngei turah ngai ila, Health department hmalakna kawngah thil dangin a tawrh loh tura thutlukna an siam a nih chuan sorkar thurel hi mipuite tan thil lawmawm tak a ni. He thutlukna hian ram leh mipui hmasawnna turah kawng dangin nghawng nei zui lo se, mipuite zangkhaina tur zawnga sorkar a kal hi thil lawmawm tak a ni.