Chaw, sa, thlai leh oil-a intodelh

Mizoram chief minister chuan, chaw, sa, thlai leh oil-a intodelh turin a production cost (a thar chhuahna senso) sang mahse an kal dawn thu a sawi a, "Buh leh thil dangah thingtlang lo nei miah loin mechanise-in kal ta ila, Zoram hi rice, wheat, vegetables leh thil danga intodelh vek theihna Pathianin WRC area min pe, chu chu kan kutah a awm. Thlai leh a ken tel thil dangah export (thawn chhuah) tham nei turin ram kan nei," a ti. 

Kan chief minister hian kan ram hi a vei a, kan intodelh theih dan hi a sawi fo ṭhin. A chhutna anga chhut hian kan ram zau zawng, ram ruak kan neihte hi a takin hmang ṭangkai thei ngat ila he ram chhunga mipui nuai 11 vel ei ur hi chu thawk chhuak thei ngei tur kan ni. 

Chief minister sawi ang hian tlang ram lo neih anga kal loin, khawl nen hna thawk ta tak tak se, kan kuthnathawktute hian rei lo te chhungin kan ram kham khawp hi an thar chhuak thei mai dawn a, chu mai chu ni loin a thawn chhuah turte nen an thar chhuak thei ngei ang tih a rinawm.

Chutihlaia zawhna lo awm ta chu, "Engtin nge tlang ram lo neih hi kan kalsan theih ang a, khawl hmanga tunlai thiamna hi eng tin nge kan loneitute hi kan hmantir theih ang?" tih hi a ni ta a ni. Kan ram zau zawng leh ram ruak awm dan te, kan rama thlai a ṭhat duh dante leh mipui zat lam chhut hi chuan thil awlsam tak niin a lang a; nimahsela Mizorama kan sorkar neih tawhte hian tun thlengin he ram hi intodelh turin an la kaihruai thei lo a ni. 

MNF kaihhruai sorkar a ding a, kum khat chuang ro an rel hnuah intodelh tura an kal dan tur hi a sawia sawi bak hmuh tur a la awm meuh lo a; a taka thawh chhuah a, chaw, sa, thlai leh oil-a intodelh hlan hi a nghahhlelhawm takzet a ni.