Education reforms

School Education minister chuan, Mizoramah education reforms kalpui tum a nih thu a sawi a, Human Resources Development Board hmanga kalpui tum a nih thu a sawi. 

Mizoramah hian siam ṭhat ngai tam tak zinga langsar ber pakhat chu kan education hi a ni awm e. Kan zirna hi siam ṭha ngat ila chu, tuna kawng hrang hranga kan harsatna tam tak hi chu sut kian a ni ngei ang tih a rinawm a, kan zirna ber hi a kal fuh loh chuan kan ramin a tuar zel dawn niin a lang. 

Tunah hian zirna atan kan inseng nasa a, mimal leh sorkar pawhin sum tam tak an seng. Kan fate zirna atan sum, hun leh tha kan seng a, kan fate zirna a nih miau avangin nu leh pa pawhin theihtawp chhuahin an neih ang ang an pe hreh lo. Sorkar pawhin zirna lamah sum sen a hreh lo a, zirtirtute pawh an hlawh a ṭha thawkhat hle. 

Hetihlai hian kan ram chhunga zirna kawng zawh tluan a, master degree thlenga zir chhuak ngatte pawh an zirna zawna chhawr zui tlak mang lo an awm a, India ram hmun dangte nena thiamna lama intihsiaknaah kan hniam hle. Schedule tribe-in quota a nei chung pawhin exam hrang hrangah kan lan phak meuh lohna a awm a, hei hi kan education kalphung fuh tawk loh vang a ni thui hle ang. 

Sorkarin educa­tion reforms kalpui a tum thu minister-in a sawi hi a lawmawm takzet a, hei hian kan ram hmelhmang pawh thui takin a thlak thei turah beisei ila; nimahsela a kalpuitu tur Hu­man Resources Deve­lopment Board erawh tun hnaia din chawp, Mizorama kan mithiam ber ber awm khawmna ni lem lo, a ṭhente phei chu political party lama nihna neih vanga dah luh nia langte an ni. 

Kan ramin education reforms kalpui a tum tak tak a nih chuan, a kalpuitu tur lam leh a kal hmang duangtu lam hi uluk hmasak a ngai ang.