Ballboot buntute’n an pet a ngai ta

North East Students' Orga­nisation (NESO) bultumin tun hnai khan India hmarchhak state hrang hrang khawpuiah Citizenship Amendment Bill (CAB) duhlohna lantir a ni a, Aizawlah pawh MZP huaihawtin sit-in protest huaihawt a ni. He huna thusawitu MZP president chuan, CAB vanga Joint NGO-te'n Republic Day boycott an tum ṭumin sorkar hotute chuan 'Sorkar tìr kan ni a, duh thuhmun, duh loh thuhmun kan ni. Inkhel ho tur kan ni a, ballboot min buntir phawt ula, hma kan lo la ang' an tih thu a sawi a, "Ballboot kan buntirte hian hma an la em tih hi kan zawhna a ni," a ti. 

Ram, hnam leh kan sakhaw khawih thilah Mizo mipuiin duh loh rawn kan nei a, chu thila inlungrual taka lungawilohna lantir tum a nih apiangin sorkar a inrawlh ṭhin. Sorkar hian a tih tur dik tak a nihna chin a awm a, a sorkarna vawnfung chelhtu berin lungawilohna a lantir kha a remchang vak lo pawh a ni thei a, chutih rualin a hnam anga chet kan tumnaa ban an phar a nih chuan ram leh hnam aiawhin an che zui ngei tur a ni. 

CAB chungchangah Mizo­rama tlawmngai pawl lian ber berte’n ṭum hnih chet lak an tum chu sorkar inrawlh avangin ṭhulh tlukin a zuzi ta a ni ber. CAB duh loh vangin Republic Day kha boycott ta ngat ila, CAB kan duhlohna hi India ramah a thang ang a, min barh lui a nih pawhin kan duh lohzia hre chunga che an ni tawh ang. Union Home minister Amit Shah kha pawndum nen lo hmuak ta ngat ila, kawn tinah Mizo mipui lungawi lo pungkhawm ila, CAB chungchanga Mizote ngaihdan hi India-in a hre chiang zawk ngei ang. 

Sorkar laipui kan hlauh luat vang nge, fin hmel takin sorkarin ban a phar zel a, kan lehkha thehluhte leh kan ‘titipui’ ringawtte kha chu a thawk na vak dawn lo a ang. Chutih rualin ballboot buntu kan nei a, an inhuam leh an insawi ang ngeiin ballboot buntu ngeite hian CAB chunghangah hian ball hi hêl kual loa an pet lirh ngam a hun ta.