Ram ngaw neih belh

Forest Survey of India (FSI) chhinchhiah danin, kum 2015 aṭangin kum tin Mizoramah ram kâng a tlem tial tial. ISFR-2019 report-a a lan danin, December 2017 aṭanga February 2018 chhunga satellite data hmanga zirchiannaah, Mizoram puma ram hring (forest cover) zat chu Mizoram zau zawng aṭangin 85.41% a ni. State zau zawng aṭanga tehin hmarchhak state zingah Mizoramah forest cover a zau ber. 

Tun hnaia mi­thiamte tehna aṭanga Mizoramin ram ngaw a la nei zau ṭha leh, ram kang zat kum tina a tlahniam hret hret tih hriat hi thil lawmawm tak a ni. Mizoramah ram a kang nasa a, kan ram hring ṭha neihte a lo ro zo a, sik leh sâ a danglam zo a, ramsa leh sava mai bakah sanghate thlengin an tuar a, kan buai hle tih kan sawi laia chanchin duhawm hriat tur a awm hi a lawmawm takzet a ni. 

Hetihlai hian kan thing leh maute hi tun aia ṭha zawka humhalh theih a ni ang tih a chiang. Tlangram lo neih tihtawp tumin sorkarin rawtna hrang hrang a siam tawhte hi uluk zawka enzui ni ta se tun ai hian kan ram hi a la hring ṭha zawkin a rinawm. Kan sum sen zozaite kha a nihna ang taka hman chu ni ngat se, ramngaw pawh kan ngah lehzual ngei ang. 

Sorkar thar kan nei a, anni hian kan rama ram kang tlem tawlh tawlh hi a tlem lehzualna turin ruahmanna ṭha tâk nei thei se; kan thing leh mau hal rêm zawng ni loa eizawnna ṭha kawhhmuh thei turin ngaihtuahna seng se, kan ram hi India rama hmun hring nuam bera chhuah tura ṭan lâk ni se a duhawm hle. 

Tun hnaia FSI chhinchhiahna hi kan ring dâwn a nih chuan ramngaw humhalh kawnga kan hmalakna te, thing leh mau hal rala leh tlang ram lo neih titlem tura ṭanlaknate pawhin zawi zawiin rah ṭha a chhuah niin a lang a, a lawmawm hle.