Ran lakluh

All Mizoram Poultry Farmer Association (AMPFA) hruaitute chuan Mizoram sorkarin ar lak luh phalna (permit) a pek loh laia ar tawlh luhte dan kawngah sorkar thâ tihchak zel an tum thu an puang a; November 15, 2019-a Lungdai leh Sihphir inkara ar puah sa lambuntute chu AMPFA mi leh sate an nih thu an sawi bawk. 

Mizoramah ar­saa intodelh tuma hmalakna hun rei tak aṭangin kalpui a ni tawh a, tun thlengin state pawn aṭanga ar lak luh erawh a la tawp hleithei lo. Congress hunlai khan NLUP hnuaiah ringawt pawh poultry hnuaiah sum tam tham tak sen a ni a, chhungkaw ṭhenkhat phei chuan eizawnna atan ar vulh hi an hmang ta hial a ni. 

Hetihlai hian Mizoram pawn aṭangin ar lakluh hi a tawp tak tak ngai lo a, ar puah sate hial pawh an rawn tawlh lut tawh. State pawna ar vulhtute hian man tlawm zawka an hralh theih avang pawh a ni mai thei, Mizoram chhungah ngei ar lei tur awm ve tawh bawk mah se state pawn aṭanga lakluhte hi an la in hralh thei hle. 

Sorkarin Mizoram chhungah ngei ran vulh lama intodelh hi a tum tak tak a nih chuan a lakluh lam hi khuahkhirh a ngai a, bawhzui hlawh lem loa a thuphunga khapna thuchhuah ringawt hi chuan awmzia a nei vak lo. 

Tun hnaia thil thleng pawh hi ar lakluh khaptu sorkar lamin a khapna thupek chhuah a bawhzui loh vangah a puh theih. Hetihlai hian kan rama ar vulhtu lam pawhin state pawn lamte aiin a a man tisang bik lo se, mipui pawhin a man inzatah chuan Mizo ar vulh ngei lei turin inngen thiam bawk ila, state pawn aṭanga ran lalut loa awm hlan hi a nghahhlelhawm tawh hle a ni.