Ramri inhnialna awmze nei lo?

Assembly session neih zawh takah Congress Legislature Party (CLP) leader zawhna chhangin Home Minister chuan, Assam leh Mizoram sorkar ramri atan Mizoram sorkarin BEFR, 1873 hmanga August 20, 1875-a Inner Line Notification tihchhuah a pawm thu leh, Mizoram leh Tripura, Manipur, Myanmar leh Bangladesh ramri atan BEFR, 1873 hmanga March 9, 1933-a Inner Line Notification tihchhuah a pawm thu a sawi. 

He zawhna kal zelah hian zawhna zawttu chuan, June, 2019-a Assembly session neih ṭuma Home minister-in ramri zir chian mek a nih thu a sawi laia November, 2019-a ramri pawm chin tihchian a ni ta chu lawmawm a tih thu a sawi rualin, "Ramri chin sorkarin a pawm hi humhalh turin eng angin nge ruahmanna a siam?" tiin a zawh belh. 

Tuna kan sorkar kalphung en hi chuan, a him chin aṭangin hnam dang leh state dangin chhiah an khawnna ramri chhung kan kawk a, "Khumi chin khu kan ram a ni a, 1875-ah khan ziakin tihfel vek a ni tawh," kan ti a, kan duhtawk zui hi a ang ber. Tlawh chhan neia ramri pawm chin nei mah ila, chu ramri kan sawi chhungah chuan Assam lam an duhthalin an cheng a, a ram neitu (nia inchhal leh chhiah khawntu) pawh Assam lam zel an ni a, "Kan ram," kan tih chin hi kan kawk a, kan humhalh chuang lo ni berin a lang. 

Kan ram rorelna in sang berah an hunlaia ramri chungchang chinfel bik lo political party-a member-in ramri chung­changah zawh­na a zawt a. Chu chu ramri humhalh tura a taka ke la pen bik lo ruling party lamin an chhang a ang ta ber mai. Tunah chuan Assam nen kan ramri avangin Mizoramah party leh party kan inchirh theh a, mipui kan phun a, Assam-in chu ram kan sawiah ngei chuan buh leh thlai an chingin an thar mek a ni. 

Ramri hi sawihoa fel chi a ni vek lo a, a zir chiang tur bik indin hmanga chinfel pawh thil harsa a ni. Chutihlaia kan chief minister-in a chinfel dan a hriat a la sawi duh si lo hian Mizo mipuite a tihrilhhai ta lek lek mai. Engpawhnise ramri kan kawk a, "Khu mi chin khu," tih ringawt hi a tawk ta lo a, tun aia na zawka ken pen ngam a nih loh chuan, tualchhunga a sawia sawi leh inhnial hi chu awmze nei lo mai a ni ang tih a hlauhawm zo ta.