MLA hlawh pung

Assembly session-ah Mem­ber of Legislative Assembly (MLA)-te hlawh tihpunna tur bill pass a ni a, MLA-te hlawh chu 130.77%-in a pung dawn. MLA hlawh hman lai chu, an hlawhpui Rs. 40,000 bakah hamṭhatna (allowance) hrang hrang nen thla khatah Rs. 65,000 a ni a; hlawh tharah chuan MLA hlawhpui Rs. 80,000 bakah allowance hrang hrang nen Rs. 1,50,000 an la thei dawn. 

MLA hrang hrang­te’n House-ah hlawh pun a hun tawh thu leh an hlawh an indaih loh thu an sawi chhuak a, ṭhenkhat chuan MLA nih chu phurrit ang hialin an sawi. Bial mipuiin an bawm nasa a, chhiatni ṭhatniah sum tam tak an sen a ngai a. Thingtlang hla zawkah mitthi ruang thawn a ngai a, rethei leh harsa zawk puih an ngai a, an hlawhin a daih meuh lo angin an sawi. MLA pakhat phei chuan an hlawh pung tur chu mipuite tan a nih thu a sawi hial a ni. 

Sorkar hnathawk hrang hrangte hlawh a pun thute leh an hlawh sanziate an sawi chhuak a, hei bakah hian state dang MLA hlawh sang deuhte pawh an sawi lang hial a ni. 

Mipuiin kan MLA-te an zawhna tur chu, “Hlawh hre saa MLA inthlana chuh in ni a, eng vanga in tlin tak avanga tlem ti ta thut nge in nih? Hlawh hi em ni MLA-in nih chhan?” tih a ni ngei ang. Hlawh san hi zahawmna tehna a ni lo a, kan MLA-te hnathawh dan hi an zahawm leh zahawm loh tehna tur a ni zawk ang. 

Sorkar hnathawk chuan eizawnna tur an thlang fel a, an thiamna vanga kaisang chho zelin an hlawh pawh a sang chho zel ṭhin - an thawh rah a ni. Sorkar hnathawkte hlawh leh MLA hlawh hi khaikhin chi a ni lo a, an nihna pawh thil hrang hlak a ni. State dang MLA hlawhte nena khaikhin lek phei chu thil inhmeh lo a ni a, state dang sum thawh chhuah zat leh kan state sum thawh chhuah hi Mizoram mipuite’n an khaikhin tel palh ang e. 

Inthlan dawna MNF party au hla cheng nuai thum pawh an la sem hman hma a, MLA-te hlawh zawk tihpun hi a inhmeh lo a; an hlawh lak mek avanga an zahawm lohna emaw, an hlawh a pun tak avanga an zahawm sawtna tur emaw awmin a lang lo.