Buaina chinfelna sum
November 15, 2019-a Lungdai leh Sihphir inkara ar puah sa Rs. 6,72,000 hû inchhuhsak leh inpaihsak chungchangah All Mizoram Poultry Farmers' Association (AMPFA) leh Vairengte Arsa Zuar Association (VAZA) hruaitute chuan tun hnai khan inremna an siam a; VAZA member-te hian an sum hloh ang zat chu an hmu lêt leh dâwn.
Vairengte aṭanga ar thawn paihsak a nih chungchangah hian thu leng vel a tam hle a, a paihsaktu lamin an paih chhanah sorkar thupek an ṭan chhan a, Mizorama ar vulh hralh tur tam tak a awmlaia state pawn aṭanga ar lakluh chu ṭha an tih loh thu an sawi. An thusawi hi thui tak a dik a, mahni rama ar vulhtute hian duhsak hi an phu hle a ni.
Chutihlaiin Vairengte aṭanga ar tawlh luh hi state pawn aṭanga lakluh ni mah se Vairengte lama Mizote'n an pawisaa an lei, an sawngbawl leh a ṭhente chu an puah sa vek a ni a, Mizo chhungkaw tam tak eizawnna a ni. Heng arte hi Mizorama lakluh a nih hnua an paihsak mai hi an lainatawm a, mi eizawnna intihbuaisak hi a tuartu tan a na duh dawn hle a ni.
Sorkar thuneitu lamin bialtu MLA hoin ban an phar a, remna an siam ta hi thil lawmawm tak a ni. Chutih rualin VAZA lamin cheng nuai ruk chuang zet pawisa an hmuh let tur hi eng pawisa nge a nih a, eng anga in rul tur nge an nih tih hian ngaihtuah a tithui a; tuten emaw mi arsa zawrh tur an paihsakna senso sorkarin a rul ringawt tur anga lang hi chhui chian deuh chu a ṭhat hmel. Remna siam a ṭha a, chutihlaiin remna siamna hmanruaa sorkar pawisa an hmang a nih chuan kal hmang fel taka tih ngei tur a ni ang.