Halpuah hal versus sangha bomb

Home minister hoin Krismas leh kum thar vuakvêta sorkarin hàlpuah, hàl­mawi leh meithallàwn khapna thupek a chhuah bawhzui dan thlir lêt a ni a; hàlpuah leh hàlmawi kawl leh hâl vangin mi 22 man niin, an lakah police station-ah thubuai ziah luh a ni. Hàlpuah leh hàlmawi Rs. 1,00,000 hû police-te'n an man bawk.

November 21 khan Phaizau khuain lui an hum­halha sanghate chu an bialtu MLA leh MNF block president leh an ṭhiante'n an bomb a, hei vang hian Phaizau V/C-in an phut angin Rs 10,000 an chawi a ni. He thilah hian mi ṭhahnemngai FIR thehlut pawh an awm tawh a, dan bawhchhiat tam tak an nei nia a lan laiin sorkarin an hrem thu tun thlengin hriat a la ni lo.

Kum tinin kum hlui thlahna leh kum thar lawmna atan halpuah leh halmawi hal lo turin sorkarin khapna thupek a chhuah ziah a, tlem lai deuh khan halpuah thawm awm mang loa hun pui hman kumte awm bawk mah se, tun hnaiah chuan zawm a hlawh ta lo hle. Aizawl khawpuiah phei chuan khaptu awm lo ang maiin zan reiah thawm a ring a, halpuah haltu an tam tehlul nen mi 22 chiah man an ni. 

Halpuah hal leh halpuah zuar/ kawl man an nih laia dan loa bomb lo kawl a, khawtlang phal loh lui humhalh laia sangha bomb a, an bomb ngei a ni tih fian­fiahna tur thlalak a darh piah lamah anmahni ngei pawhin khawtlang hruaitute hnenah pawisa an chawi tawh chung pawha sorkar a ngawi tlat mai hi a mak hle.

He thil hi politics zawnga lak chi pawh a ni lo a, thil tisualtu zingah mi langsar takte an awm avang hian anmahni party lam va dem tur a ni bik lo a; nimahsela sorkarin hremna alekkawh lo a nih thung chuan sorkarna vawn fung chelhtu MNF party chu dem loh an har hle thung ang.

Khawpuia halpuah haltu pawh man an nih chuan, bomb hmanga sangha man a, anmahni ngei pawhin an man tih pawma V/C hnena pawisa an chawi tawh hnu pawha sorkar a la ngawi tlat a nih chuan mipuiin a chhan an zawt ngei ang le.