SEDP sem dan tur

Assembly session neih zawh tâka ziaka zawhna a chhannaah Planning & Programme Imple­mentation changtu chief minister chuan, SEDP chu a thlawna mipui hnena sem tur a nih loh thu a tarlang a; kumin chhunga SEDP hnuaia ṭanpuina dawng tur zat tak a la hriat theih loh thu leh, SEDP hi instalment system-a sem tur a ni lo tih a ziak lang. 

SEDP hi kan sor­kar innghahna, kan sorkarin a vau­chher ber leh ram hmasawnna kalpui a tumna kawngpui ber a ni a, chutihlaiin mipui lam hi chuan eng chiah nge a nih kan la inrinsiak mek a ang khawp mai. Kan MLA-te meuh pawh an hre chiang lo a, Hose-ah pawh SEDP kalphung hi an la inzawt ve mek a ni a, mipui tan chuan lo hriat fiah vek a harsa khawp ang. 

SEDP kalpui dan tur pawh a tira sawi leh tuna an sawi inang lo a tam ta mai a, a pawimawh ber erawh chu Mizoram hmasawnna tura an hlawhtlinpui hi a ni ang. A sum hnar pawh central sorkar aṭanga kal tura ngaih a nih zet hnuah tunah chuan state budget aṭanga an pawh pen tur thu an tarlang tawh a; nimahsela sorkar laipui aṭang hian sum hi lo la kal mai loin, 'central-ah SEDP kaihhnawiha sum hmuhna atan proposal (ruahmanna) thehluh a ni tawh,' tih chu House lama zawhna chhanaa a lan dan a la ni chauh a ni. 

Thil lawmawm tak erawh chu SEDP hi a thlawna sem tur a ni dawn lo tih CM-in a sawi chiang hi a ni a, a thlawna thil sem hian ram a siam ṭha lem lo tih a takin kan hmu tawh. Chu mai chu ni loin SEDP hi a chhawnga tlem tlema sem (instalment) a ni dawn lo tih CM-in House a hrilh a, chuti a nih chuan a dawngtu tur lamin a pawisa hi a hlawmin an dawng nghal vek dawn a nih hmel a, a lawmawm hle. 

SEDP sawi apianga sawi hmaih theih loh chu 'cheng nuai thum' hi a ni a, instalment-a pek a nih dawn loh phei chuan hnathawhna atan a ṭangkai hle ang. Mipuiin, "Min pek loh chuan kan vote lo ang che u," an ti pawh ni loa anmahni lam zawkin, "In dawng dawn," tia chiang taka tuna kan CM-in min tiam kha a ni a; cheng nuai thum kan dawnna tur MNF president-in a sawi kha SEDP hi a nih chuan, mipuiin SEDP instalment ni loa a hlawma sem hlan an nghakhlel tawh takzet a ni.