Raw chîn dan ruahmanna
Bamboo Development Board chuan rua chîn bulṭanna turin model plantation siam an rél a; raw chî (seedling) supply-tu tur an thlang fel tawh a, raw chi an pek hmangin kum tharah chhungkaw 100-200 vel enkawl tur model plantation siam an rêl a ni.
Mizoram sorkarin rua hmanga state dinhmun chawi kan tumin ṭan a la a, Mizorama kan mau leh rua neih sate chu a ṭha tawk loah ngaiin raw chi thar chin tumin ruahmanna an siam. Heng ruate hi kan rama kan raw neih sate aia lian leh sang ṭha zawk, hralh suma chantir pawha hlawk zawk tur a ni.
Sorkar hian raw chin dan ṭha zawk leh awmze nei zawka kalpui a tum hi a lawmawm a, tunlai thiamna nen kal kawpin ṭha takin bul ṭan se a duhawm khawp mai. Rua chungchanga inhnialna lian tak awm mek - kan rama mau leh raw awm sa hman ṭangkai tum aia hmun dang aṭanga raw chi ṭha lak luha kui ṭiaha tihpuitlin hi sorkar chuan a thlang ta zawk a nih hmel a. Sorkar hian a duh a thlang fel tawh bawk a, hlawhtlinpui ngei turin ke pen rawh se.
Kan rama mau leh raw awm sate pawh kan hausakpui theih loh laia hmun dang aṭanga a chi lakluh a, kui ṭhiah chawp a, chin puitlin a, chumi hnua phurh/ lak chhuahna tur kawngpuite (bamboo link road) laih chawp a, a hralhna tur la zawn chawp cheu ngai a nih vangin mi tam takin rinhlelhna mit nen an thlir a; kan sorkar hian raw hmang hian Mizoram hi intodelhtirin a ringhleltute rinhlelhna hi a dik lohzia finfiah thei se a lawmawm ngawt ang.