Hunpuia mipui himna

Hunpui lo thleng tur, Krismas leh Kumthar lo thleng tur mipuite’n hlim leh him taka an hman theihna turin police leh YMA-te’n theihtawp an chhuah tur thu tun hnai khan a sawi. 

Hunpui a lo thlen hian mitin maiin nuam taka hman duhin ruahmanna kan siam ṭhin a, mi lian leh mi te berte pawhin kan phak tawkah he hunpui hi hlim taka hman kan duh ṭhin. Chutihlaiin he hun­pui bawk hi mi ṭhen­khatin suahsual rawngbawlna rem­changah an hmang ve ṭhin bawk a, chumi piah lamah mi an zanlenin an heheu a, zan lamah chhuak vak an tam a, hei hian a ṭha lo zawnga ken tel tam tak a nei ṭhin. 

He’ng hunpuiah hian rukruk leh pawi khawihna dang a thleng tam a, zu leh ruihhlo a zalen ṭhin. Hengte veng tur hian police ṭha chakna mai a tawk lo a, khawtlang ṭang rualin mahni huam chhungah vengtu tur inruatin tlawmngaiin mahni khua leh veng ṭheuh kan veng a, hei hian boruak a tiralmuang ṭhin hle. 

Halpuah leh puak thei thil dangte pawh khap a nih angin mipuiin zawm ṭha ila, heng thilte tel loa hunpui hlim taka hman hi a theih a ni tih a takin kan lantir tawh kha i hre thar ang u. Chutihlaiin hun­puiah hian kan ṭha­­laite pawhin hun nuam leh zalen tak hman an thlahlel ve bawk a, tute emaw rui ṭhinte avanga ṭhalai intihlim duh zawng zawng veh a, vai hma palh te a awm thei a, khaw daia inkawm khawm tura chhuak zawng zawng um leh zim luih luih erawh a finthlak ber lo ang. 

Home minister hoa mipui himna tur an ngaihtuah hi a lawmawm a, mitinin Krismas leh Kumthar him leh hlim taka kan hman theihna turin midangte tana hnawksaka awm lo zawngin he hun hi i hmuak ang u.