Zirlaiah ṭan a ngai

DIET, Aizawl chuan tun hnai khan 'Awareness programme for school community members on prevention of drug abuse under NAPDDR' an buatsaih a. Aizawla local council, YMA, MUP, MHIP, kohhran ṭhalai pawl, SMC, PTA, BRCC leh CRCC aiawhte an tel. 

Ruihhlo avangin Mizoramin harsatna nasa tak a tawk a, chhungkaw tam tak an rum mek a ni ber. Ṭhalai hnathawk rual hnathawk thei loin an buai a, a hnathawk tur zawka ngaih kan ṭhalaite nu leh pate buaipui ngaiin an awm zawk hlauh a, a zialo hle a ni. 

Mizorama ruihhlo kan do dan tlangpui hi ruihhlo lo lut tur dan leh ruihhlo ti ṭhinte buaipui lam hi a ni deuh ber a, ruihhlo la ti lote zirtirna pek ṭhat hi kan mamawh hle. Hei vang tak hian zirlaite hnena ruihhlo ṭhat lohzia zirtir 

a ṭul a, mahni ṭhahnemngaihnaa kalpui a ṭhat rualin mithiamte zirtir­na anga kal hi a ṭul tawh takzet a ni. 

Ram changkang zawka zir­chianna an neihah nu leh paten fate an awp a, an thiltihna hrang hranga an kaihhruai a, an tawiawm tamna hmun­ah an thalaite ruihhlo lakah an fihlim tlangpui tih a ni. Mizote nunphungah chhiatni thatnia kan thalaite khawsak dan leh nu leh paten kan thlahthlam dan te pawh hi zirchian a, ennawn tham a tling. Tlawmngaihna hi kawrah hmangin kan thalaite hian hum sual daina remchangah an lo hmang reng palh thei a, tlawmngaihna hi kan lo chhiat pui viau thei e. 

DIET lamin khawtlang hruai­tute hnena ruihhlo dona lam an zirtir hi a lawmawm a, hei hi tun aia uara kalpui theih ni se a lawmawm hle ang.