Hnam dang hming hawhtir

Mizo Zirlai Pawl (MZP) Sub-Headquarters, Thenzawl leh Thenzawl Venghlun Branch YMA-te chuan, Thenzawl Venghlun huam chhunga hnam dangte'n Mizo hming hawha hotel/ restaurant an siam pathum chu February 2020 chhunga titàwp turin an hriattir. Thenzawl Tourist Lodge bula hotel leh restaurant siam a, dawr tê siam nghal bawk mi pathumte chu Mizo hming hawha siam a ni tih an hmu chhuak a ni. 

Mizoramah hian Mizo hming hawha sumdawnna kalpuitu hnam dang eng emaw zat an awm a, heng zingah hian mi ṭhenkhat chu sumdawnna lian tak tak kalpuitute an ni hlawm. Heng mite hian zawi zawiin mi an ei mek a, kan ram sum leh pai tam tak min chhuhsak piah lamah an sum hmangin Mizo tam tak hi an thuhnuaiah an dah tawh a ni. 

A hunlaia endik/ hnawh chhuah loh an nih avang hian zawi zawiin an inla lian zel a, sum an ngah tawh hnuah chuan pawl tam tak hi an tilungawi zui ta ni awm tâk a ni, hnam dang sumdawng lian hnawh chhuah sawi tur hi an awm mang hauh lo. Kan tlawmngai pawl 

ṭhenkhat pawh hian Mizo hming hawha sumdawng hnam dangte lak aṭangin pawisa an khawn a, chuvangin heng hnam dangte hi an tlangnel sawt nia sawi a awm bawk. 

Thenzawl khawtlangin Mizo hming hawha sumdawnna kalpuitu hnam dangte ngai­mawha titawp tura hma an la hi a lawmawm a, Mizoram hmun dangah pawh huaisen taka kalpui ve ni thei se a lawmawm ngawt ang.