Sorkar hnathawk leh an thawhna hmun

Power & Electricity depart­ment minister chuan P&E Engi­neering Officers' Association intawhkhawmnaah officer rualte fuihin, "Mizoram hi kan ta a ni a, khawi hmunah pawh awm theihna rilru put thiam a pawimawh. Chutih rualin, hmun khata rei tak awm erawh chu thil ṭha ber a ni lo a, hmun ṭha leh nuam te, hmun hla leh harsaa ngaihte hi ang khata hrût a, Transfer & Posting Rules anga kal mai hi a ṭha ber a ni," a ti. 

Mizoram sorkar tibuaitu lian tak pakhat chu sorkar hnathawktuten awm duhna bik leh awm duh lohna hmun an nei ṭhin hi a ni. Hlawh inang veka thawhna turah hmun ṭhenkhat chu an inchuh a, a ṭhen chu pumpelh hram dan zawngin thuneitute an ruai a, department ṭhenkhata hnathawktute phei chuan aikal an ruai hial a ni.

Tun hnaia School Education department lamin zirtirtu an lak vak chhan lian tak pakhat chu thingtlang khaw hmun kilkhawrah zirtirtu indaih lohna a nasat vang a ni. Sorkarin zirtirtu a nei tlem ta lutuk tih lam aiin thingtlang kilkhawra a taka hnathawka kal peih leh kal duh zirtirtu a nei mang lo a, a tir kal zo meuh bawk si lo a, chuvangin zirtirtu lâk belh chiam a ṭul ta a ni ber mai. 

Department hrang hrangin harsatna an tawh dan inang vek lo mah se, transfer leh posting-ah hi chuan sorkar hian harsatna hi a tawk lian hle a ni. He harsatna su kiang thei tur chuan sorkar huaisen tak neih a ṭul a, P&E minister sawi anga Transfer & Posting Rules anga kal mai hi a ṭha ber a ni. 

Tunah erawh kan sorkar hrawn tawhte hian Transfer & Pos­ting Rules anga kal hi harsa an ti tawh a, department fakawm tak a hun taka transfer leh posting kalpui ṭhin awm bawk mah se, sorkar department tam zawkte hian transfer leh posting-ah harsatna an tawk a, a chinfel theih dan awm chhun nia lang chu huaisen taka dan anga kalpui mai hi a nih hmel.