Ram neih dan dik lo leh Mizote
Mizoram University (MZU)-a pawl pathum - MZU Teachers' Association, MZU Non-Teaching Employees Association leh MZU Students' Council-te chuan thuchhuah siamin, MZU ram chhungah mimal ram neia inchhál leh MZU ram nék zawnga hma la an awm thu an tarlang a; ram zawrh leh lei chungchangah fimkhur turin mipui an chah.
Hetihlai hian Congress party chuan NH 306 zauhna tura kawngpuiin a paltlang tur khaw ṭhenkhata dik lo taka periodic patta dilnaah MNF sorkar thuneitu säng an inrawlh niin an sawi a, VC seal lem a awm ngei nia an hriat bakah MNF hruaitu ṭhenkhat inrawlh ngei nia an hriat thu thuthar thehdarhtute hmaah an puang.
Tun hnaia thil thleng pahnih ngun taka en hian, Mizorama mi ṭhenkhatte hausak dan dik lo chiang takin a hmuh theih. Sorkar emaw, pawl emaw ram nek zawnga hma laa a tawpa a nektu zawkin ram an neih hlen tâk hi tam tak sawi tur a awm a; sorkarin industry dinna tura ram a dah hran chhungah ngei mimal in hmun nei tam tak an awm theite hi a pawi takzet a ni.
Sorkarin project lian tham a nei dâwn a, ram a lei/ lâk belh dâwn a ni tih lo hre hmasatu mi thiltithei deuhin VC pass lem, periodic patta lem siama zangnadawmna an la ṭhin hi a zahthlakin a pawi takzet a, hei hi kan rama project ṭhenkhat a hlawhtlin theih loh chhanah pawh a puh theih hial ang.
Hei bakah hian thingtlang mite ram neih sâ nakin lawkah man man zawkin a la hralh theih dâwn tih lo hriat ruk avanga pawisa nei zawkten an lei khawm a, sum siam nana hmang ṭhin an awm a, hengte pawh hi thil kal dan tur dik a ni lo ang.
Mizoramah hian 'hausak thut' tumna a lian hle tih a lang a, hei hi a pawi takzet a; he thil pawi tak tih tuma hma la ngar ngar an la awm hi a vanduaithlak hle. Ruling party mi leh sâ zingah dan loa period patta siam tum an awm a nih phei chuan party mualpho theihna a ni a, MNF party thuneitute tán pawh khap sak ngei chi a ni zawk ang.