Ram danga hna thawh

Mizoram Police chuan thuchhuah siamin, ram danga hna thawk tura chhuah tumte chu fimkhur turin an chah a, "Document leh passport dik tak hmanga danin a phal ang thlapa kal hi mahni himna a ni tih hria a, danin a phal ang thlapa kal turin kan ngen a ni," an ti. 

Mizoramah hna a vâng a, hlawh ṭha zawk beiseiin tun hnaiah Mizo ṭhalai eng emaw zat chu Dubai, China, Singapore, Malaysia, Macau leh ram dangah inhlawh turin an kal chhuak a; nimahsela ṭenkhatin document dik tawk lote kengin harsatna lian tak an tawk mek. 

Hnathawk tura ram danga kal chhuak zinga document fel lo vanga harsatna tawk hi chi hnih an awm a, ṭhenkhat chu an hriat loh avanga mi ṭhenkhatin an bumte an ni; ṭhenkhat erawh hre reng chunga passport leh visa hmuh duh luat avanga dik lo taka thil tite an ni. Miin harsatna an tawh tawh chuan theih anga puih an ngai tawh ṭhin a, an thawhpui Mizo dangte leh an hnathawhna hmuna Mizo awm vete'n an buai phah ṭhin hle a ni. 

Ram danga hna­thawk tura kan infuih rual hian harsatna awm thei leh fimkhur ṭulna lam hi kan sawi uar a ngai a, tun hnaiah Mizoram Police-in mipuite tana zirtirna pawimawh an chhuah hi a lawmawm hle. Kan ṭhalaite hian an thawh thiam chi, hlawh ṭha zawk hlawh theihna hna thawk tura ram danga kal hi hlau loin um zel se; nimahsela dan ang taka felfai taka kal an nih leh nih loh erawh an inenfiah hmasak zel a ṭha khawp ang.