Sorkar hnathawkte leh an thil neih

Tun hnaia Council of Minister ṭhukhawm chuan sorkar hnathawk Annual Statement of Immovable Property Returns thehlut lote hlawh hrensak an rel a; Vigilance department aṭanga agenda lut 'Withholding of Pay of Government servants who fail to submit Annual Statement of Immovable Property Returns' tih chu an pawm.

Sorkar hnathawkte hian dan angin kum tin ‘Immovable Property Return’ an thehlut tur a ni a, an thil neih ang angte sorkarah a nihna angin an ziak lut zel tur a ni. Hetihlai hian Mizorama officer ṭhenkhat chuan hei hi an ngai pawimawh loin an namnul nasa a, an thil neih ziaka thehlut ngai lo hi eng emaw zat an awm. Hei hi officer-te thiam loh a nih piah lamah sorkar inthlahdahna a lantir a, tuna sorkarin Annual Statement of Immovable Property Returns thehlut lo hlawh a hrensak tur hian awmzia a neih ngei a beiseiawm. 

Ram dangahte chuan mi hausa hi hun rei tak sumdawng, thlahtute aṭanga lo hausa tawhte an nihlaiin Mizoramah hian ‘hausa thut’ an tih mai hi tam tak an awm. Ṭhenkhat chu an sum hmuh dan rinhlelhawm tak, tun hmaa mi lian nia hriat ngai loh kum rei lo te chhunga lian ta hluaite an ni a, ṭhenkhat chu sorkar officer an nih hnua namen loa hausa tate an ni. 

Sorkar hnathawk hlawh zat chu tlang hriat a ni a, sorkar aṭanga dan hnuaia hamṭhatna an neih theih chin tur pawh hriat sa vek a ni. Chumi piah lama sorkar hnathawkin pawisa a neih viau chuan thil fel tawk lo a awm a ni duh a, heng thilte en fela chinfel theihna remchang pakhat chu Annual Statement of Immovable Property Returns ziah luh hi a ni. Mizoram sorkar thuneitute’n sorkar hnathawkte an thil neih sorkara ziak lut zel tura tihna khauh taka kalpui an tum ta hi a lawmawm a, ṭha takin khawng taka kalpui ngei ni rawh se.