Health care

Mizoram State Health Care Scheme (MSHCS) 2019-20 chu tun hnai khan chief minister-in a tlangzarh.Mizorama sorkar damdawi-in zawng zawngte chu MSHCS-in a huam dawn a ni.

Khawvel sorkar ṭha an tehfung pawimawh tak pakhat chu ram mipuite hriselna chungchang leh damlo inenkawlna hi a ni. Ram lian leh changkang zawkte chuan health care kalpui dan hi politics-ah pawh tehfung pawimawh takah an nei a, health care policy an neih dan hian inthlan thlengin nghawng a nei ṭhin

Mizoramah sorkar ṭhang deuh political party pahnih an awm a, anni hian health care scheme hrang hrang an duang chhuak a, a hmaa awmsa titawp chiah loin an thuam ṭha a, scheme hrang hrang an duang  ṭhin. Tunah sorkar thar a piang a, health care kalpui dan thar pawh a lo piang leh ta.

Mizoram sorkarin a mipuite tana damloh nikhuaa inenkawlna tur a duan thar hi health care scheme thar, ṭha leh changtlung zawk ni ngei se, a hman dan (bill dan) pawh tun hma aia awlsam leh mipuiin an chhawr awlsam theih zawk ni se a ṭha khawp mai.

Health care scheme lian tham sorkarin a han duang a, chutihlaiin mipuiin a takin an hmang dawna kawng tam takah harsatna an tawk a; a chhawrtu tur tana harsatna thlen lêt thei, bill tâng leh bill harsa tak kan lo nei tawh ṭhin. Tuna sorkarin MSHCS duang thara a hranpa ngata tlangzarhna hun a siam thar leh tak hi chuan tun hmaa health care scheme-a harsatna awm ṭhinte kha chingfel se, a chhawrtu mipuite tan awlsamna thlen ngei se a duhawm ngawt mai.