Chhui chian ngai kuhva sumdawnna

Myanmar aṭanga kuhva phurh luh chungchanga MZP hminga inpuh tawnna a awm avangin MZP Headquarters, Champhai chuan tun hnai khan Champhai Police Station-ah FIR an thehlut. 

Myanmar aṭanga kuhva phurh luh hian tun hnaiah chan­chin a ngah hle mai a, he thil hi heti maia thlir liam chi a ni lo a, sum tam tak chet velna a nih miau avang hian a nghawng pawh a lian hle tih a lang. Dan loa lakluh a nih avangin kuhva phur lirtheite tlan tawh lo tura thupek hial Champhai DC-in a chhuah hnuah pawh an tlan zui zel theite hi thil mak a ni a, Myanmar aṭanga kuhva phurh luh dan kalphung hi chuan ngaih a tiṭha lo ta hle a ni. 

He kuhva sum­dawnna lian hi Mizoram tana hlawkna ni vakin a lang lo a, Mizoram hi kalkawngah min hmang ve lek chauh niin a lang. A neitu leh a tawlhtu zingah Mizo an tel a nih pawhin mi hausa tlem tê-te sumdawnna mai a nih hmel a, chutihlaiin Zokhawthar - Champhai - Zemabawk inkar kawngpuite chu an dai chhia tia puh theih tur khawpin an phur ritin an vei zing a, a bikin Seling chhak lam chin hi kawng a chhe hma ṭhin hle a ni.

Tun hnaiah Mizorama truck neitute chuan heng kuhva phurtu hnam dang truck ṭhenkhat avanga harsatna an tawh thute pawh an lo chhuah tawh a; hnam dang truck-te hian awih harsa khawpa rate hniama kuhva an phurh ngam danah Mizo truck neitute ngaih a ṭha lo a, hengte thleng hian ngaihtuah a ṭha khawp mai. 

MZP hruaitu hlui pakhatin sum tam tham tak pea MZP hminga police leh Assam Rifles pal­tlangpui thei anga a lo insawite pawh hi thil nihna tak chhui chian ngai a ni a, sum hmanga kuhva hi kal tlangpui thei anga min an inchhal tawh a nih chuan sum hmangin dan loin tun hmain an lo paltlang tawh pawh a ni thei a, ngaih a ṭha lo zual a ni. 

Sorkar tan he thil hi ngaimawh ngei tur a nihlaiin Champhai DC thupek pawh bawhzui ngam mang loin kan awm a ang ta ber a, Myanmar aṭanga kuhva lo luh dan leh a kalphung hi chhui chian a ngai e.