Entawntlak Biate

Mizorama khawpui (census town) fai intihsiaknaah a záwna a ṭum thumna atan Biate chu Mizorama khaw fai ber atan thlan a ni. Biate hi UDPA department-in kum 2017 aṭanga khawpui fai inelna a siamah khawi fai bera thlan a la ni vek a ni. 

India ramah fai­na beihpui thlak a ni a, Mizoramah pawh faina hi chak taka kalpui a ni. Fai intihsiakna leh inenla ṭan hma aṭang tawh hian khaw ṭhenkhat chuan faina kawngah chak takin hma an lo la tawh a, lawmman dawn beisei vang ni loin lawmman an siam hma aṭang tawhin an khua enkawl fai turin ṭan an lo la tawh. Chutiang zinga thawk rim ber pakhat chu Biate hi an ni a, he khua hian tun hma aṭang tawhin fai hi an nunpui a, faina an ngaina a, fai tura inzirtirna an kalpui a, fai turin an pen chhuak a ni. 

He khuaa chengte hi an pian phungah emaw, an khawsak danah emaw, an ei leh in leh thil dangah danglamna bik an nei hauh lo a, an danglamna chu fai an tumna kawngah hian a ni. Biate khua chuan fai hi nunphungah neiin fai an tum tlat a, khaw danga mite'n kan thil eina kawr leh kan meizial bungte kan paih mai mai ang hi bawlh­hlawh bawmah chiah an paih a, chuti chuan khaw fai an lo ni ta. 

Mizote tho awmna khua, keimahni ang bawkin, "Kan khuaah bawhhlawh a awm lo," ti ngam khawpa faina an kalpui a nih chuan khaw dang tan pawh tih ve theih a ni. Fai tur hian sum sen belh chiam emaw, sorkar puihna emaw lam aiin thinlunga fai duhna neih a pawimawh ber. Biate khuain fai tura ṭan an lakna hi Mizoram khaw tinin entawn thei ila a duhawm khawp mai.