Plastic Free City

Aizawl Municipal Corporation (AMC) mayor chuan Aizawl khawpui chu Plastic Free City a nih thu a puang. Ministry of Urban Development (MoUD)-in India rama Smart City atana thlan khawpui 100-te chu October 2, 2019 aṭang­in Plastic Free City-ah inpuang (declare) vek turin a ti a ni. 

Kumin August 1 aṭang khan Aizawlah micron 50 aia pan plastic bag-te khap a ni tawh a, mipui hnenah pawh zirtirna kalpui mek a ni. Khapna a awm hnu hi chuan mipui pawhin plastic bag hmang loa awm an zir chho ṭan a, hei hian Mizo mipui nawlpui hi thuawih leh zirtir theih leh zirtir nuam tak kan ni tih pawh a tichiang awm e. 

Chutih rualin Mizoramah hun rei tak chhung polythene bag kan tih mai plastic bag hi kan hmang tawh a, a ṭangkaina leh a awlsamna a tam avang hian a tel loa khawsak erawh kawng tam takah a buaithlak chho dawn. Hei vang hian a thlakna tur paper bag siam lamah tun aia chak zawka hmalak a ṭul a, thuneitu lam pawhin hei hi hriain an bawhzui chho zel ngei ang. 

A pawimawh ber chu mipuite hnena zirtirna pek ṭhat a ni a, chumi tur chuan AMC lam pawhin tun aia chak leh uar zawka puanzarna (publicity) lam an kalpui a ṭul. A khapa khap hi thil ṭha tak ni mah se mipuite hnena zirtirna pek a, mipuite rilru hmin hi a ṭangkai lehzual ang. Tuna an kalpui danah hi chuan mipui nawlpui hian plastic khap a nih thu leh Aizawl khawpui hi 'Plastic Free City' a puan a nih thu hi an la hre tawk lo niin a lang a; Aizawl khawpui hi a thu mai ni loa a taka 'plastic free' a nih theihna turin mipuite thleng phak zirtirna uar zawka kalpui a la ngai dawn a ni.