Kut

Ni hnih awh Anthurium Festi­val chu Reiekah hman a ni a, Chief Minister-in a hawng a, Tourism Minister leh sorkar mi pawimawh dangte an hmanpui bawk a, mipui ṭhahnem takin an chhim.

Mizote'n kut kan neih zingah Chapchar Kut hi mipuiin a huhoa kan an hman ṭhin a ni a, he kut hi tun thlengin Mizo mipui tam takte nghahhlelh a ni. Tun hnaiah Min Kut leh Pawl Kut tharthawh tum a ni a, pipute hunlai aṭanga kan kut hman ṭhinte hlut thar duhna a kian zel. 

Tun hnaia kut kan hman ṭhin pakhat chu Anthurium Festival a ni a, hei hi kan hnam kutpui zinga mi a ni lo. An hman chhan ber nia lang anthurium pangpar pawh hi Mizorama tualṭo a ni lo a, hmun dang aṭanga lakluh a ni. He pangpar chingtu leh buaipuitu tam zawk hi chu kuthnathawktu chhungkua ni loin mi lian leh awm thei zawkte an ni. 

Anthurium Festival hi tawng­pawng helh emaw, sawisel emaw tur a ni hran lo a, sorkar laipui aṭanga a hmanna tur sum lo kal sa a nih vangin helai a hlawk taka hman mai hi a finthlak. Chutih rualin kan kut dangte nena a hman dan danglam a sawi tur awm vak loa kan buaipui chiam hi chu ngaihtuahna sen hret a ṭha khawp mai. 

Kan kutpui ber Chapchar Kut a ni emaw, tun hnaia kan phuah thar kut a ni emaw, a danglamna sawi tur awm mang lo khawpa kan chawm pawlh chiam hi chu a department lam emaw, kan NGO lam emaw, tute emaw hi chuan an ngaimawh a hun khawp mai. "Chumi kutah chuan chutiang chuan an ti ṭhin," tih emaw, "Chumi kutah chuan chutiang chu an ti ngai lo," tih tur tal kan neih ve a ṭha. Kut hrang hrangte uar zawka hman kan intih hmuh mek lai hian, a hman dan awmze nei zawka duan thiam a ṭha khawp mai.