Dawt thu thehdarh

Mizoram police hotute chuan, tun hnaia naupang hruai bo leh rûk bo tumna a awm anga sawi zawng zawng chu thu dik lo vek a nih thu an sawi a, tun hnaiah police-te'n naupang hruai bo thubuai ziah luh an neih loh thu an sawi. Tun hnaia naupang hruai bo tum awmna nia sawi khaw pathumahte inruk bo tumna a awm loh thu police-te hian an finfiah tawh a ni. 

Tun hnaiah Mi­zoramah naupang ruk bo ching hnam dang mi an awm niin thu a thang chiam a, social media lamah nasa taka thehdarh a ni. A thu mai ni loin Vairama inruk bona thlen tawh dan video-te pawh thehdarh tel a ni a; nimahsela heng thuthangte hi thu belhchian dawl lo a nih piah lamah, inruk bona video nia sawite pawh hi video hlui leh rintlak lo a lo ni hlawm. 

Hetihlai hian mipui nawlpui chu he thuthang avang hian an chiai nasa hman hle a, a bikin nu leh pa tam tak ngaih ṭha loin an awm hman. A chhan ber chu thil finfiah si loin, zeldin thu kan thehdarh fo a, a dawngtu lamin a dik lo tih hre si loin an thawn darh ve leh a, a tawpah chuan thudik emaw tiin an thehdarh ta chiam ṭhin. 

Mipui nawlpui kutah thu thehdarh theihna hmanrua a awm tawh a ni ber a, social media kan hman thiam loh avangin harsatna kan tawk fo a ni. Mi lehkhathiam lo zawkte tihawm tawk lekte pawh hi lehkhathiam leh chinchang hre deuhte pawhin an ti fo mai a, kan thil dawn apiang midang hnena thawn darh leh sawi chhawn hi kan sim a hun ta hle. 

Tunlai khawvelah thu a darh chak tawh em avangin kan thu thawn darh leh sawi chhawn danah kan fimkhur a ngai a, ṭul loah chhungkaw tam tak an buai phah a, tute emaw thu phuah­chawp avanga ram pumin dawt thu kan chai nia lang hi a zahthlakin a zia lo hle a ni.