Eirawngbawlna gas harsa

Mizoram Pradesh Youth Congress Committee (MPYCC) chuan thuchhuah siamin, tunlaiin Mizoram hmun hrang hranga eirawngbawlna gas a harsat hle tih an tarlang a, "Supply Minister chak lo leh nêp kan nei hi a vanduaithlak hle a ni," an ti. 

Mizorama kan buaina tawh lian tak ni reng ṭhin chu eirawng­bawlna gas hnianghnara kan dawng lo ṭhin hi a ni a, mipuiah harsatna lian tak a siam mek a ni. Sorkar inthlak ṭhin bawk mah se, eirawngbawlna gas-a harsatna hian a ziaawm lam a pan thei meuh lo a, tun hnaiah he harsatna hi a zual ta niin a lang. Congress ṭhalai lamin hetia minister demna thu an chhuah ngam chhan hi an hunlai aia ti chhe zawka an ngaih vang a ni ngei ang. 

Engpawhnise state pum buaia kan buai fona eirawngbawlna gas chungchang hi a nihna takah chuan sorkar kut pawh a ni ber lo a, chutih rualin harsatna a awm a nih chuan sorkarin a mipuite harsatna hi chu sut kiansak a tum tur a ni. Kan rama eirawngbawlna gas a harsata mipui buaina awm fo ṭhin chu a harsat chhan an hre lo ṭhin hi a ni a; sorkaran aṭangin emaw, gas agent lam aṭang pawhin thu­chhuah a awm ngai mang lo a, mipui an hrilhhai ṭhin hle. 

Hetihlai hian khaw­­puiah bik chuan dan loa (black market) eirawngbawlna gas lei tur hi chu a la awm reng a, a har­sat avangin a man erawh a sang tawh hle. Thingtlang khaw ṭhenkhatah erawh chuan a man toa lei tur pawh a awm lo a, eirawngbawlna gas an sem khat si avangin mi tam takin an nghei tawh thung. 

Engpawhnise sorkar hian eirawngbawlna gas-a harsatna thleng mekah hian thil awm dan kimchang hi mipui hnenah puangzar se, mipuite manganga an buai mek laia thuneitu lam an ngawi vung vung mai hi a hrilhhaithlak deuh a ni.