Thlarau MR

National Trade Union of Mizoram (NTUM) hruaitute chuan Mizoram sorkarin an thil beisei ṭhenkhat an tihhlawhtlin avanga lawmthu an sawi rualin, 'Thlarau MR' an tih mai, mihring awm lo, MR-a thawk anga hlawh la tho si an la awm thu an sawi a, mi ID hmanga bank aṭanga hlawh la an la awm thu an sawi. 

Tun hmaa Mizo­rama sorkar officer tam takte sum siamna ṭhin chu 'Thlarau MR' an tih mai kha a ni a, hnathawktu a tak awm si lo chunga sorkar aṭanga hnathawktute hming phuahchawpa hlawh la an awm ṭhin. Sorkar officer ṭhenkhatin hetiang hian dawt phuahchawp hmangin sum an siam ṭhin a, hei hi tihtawp tumin sorkar hmasa hunlai khan beihpui thlak a ni a, sorkar sum ṭhahnem tham tak an hum a ni. 

He thil hi a reh tawh emaw tih hnuah an la ching chhunzawm zel tih hriat hi thil pawi tak a ni. A lema MR inchhawr tihreh tumin document kimchang thehluh a ngai tawh a, an hlawh lak dan pawh bank account-ah pawisa thun vek tawh a nihlaia tun thlenga mi hming hawha bank account siam chawpa a lema MR chhawr duh an lo la awm hi man chhuah ngei a, dan anga na taka hrem ngei a ṭul ang. 

Eiruk leh hlem­hletna sawi rik a nih rual hian politician-te hi kawh mai an awlsam viau a, a bikin sorkarna vawn fung chelhtu apiang hi a chhia zawng zawng bel mai an awl ṭhin. Chutihlaia thil chiang tak erawh chu tu sorkar hnuaiah pawh hian sorkar hnathawk eiruk tum ngar ngar mai pawl hi an la awm reng a, heng mite hi ram leh hnam hmelma an ni tih hi kan sawi thar leh pawh a ṭul awm e. 

Tun thlenga 'Thlarau MR' an tih mai kalpuia sorkar sum eirutute hi man chhuah a, hrem ni rawh se.