Bru-te khawsak dan hi

Tripura camp-a Bru pawl hrang hrang - Mizoram Bru Displaced Peoples Forum (MBDPF), Mizoram Bru Indi­genous Democratic Movements (MBIDM), Bru Tribal Deve­lopment Society (BTDS), Bru Displaced Women Welfare Committee (BDWWC), Camp Defence Committee (CDC) leh AII Chudri Committec (ACC) chuan tun hnai khan Nasingpara-ah joint meeting an nei a, Mizorama kîr an duh loh chhan hrang hrangte an puangzar. 

Bru pawl hrang hrang inhmukhawm hian thil phut an neih bakah tun hnaia Bru hmeichhe pakhat, a pasal kuta tualthi anga lang chu an sawi lang tel. Bru-te chuan central sorkar leh Mizoram sorkar-in magisterial inquiry nei se, mitthi chhungte hnenah zangnadawmna cheng nuai 20 pe rawh se, an tih bakah 'Mizoram sorkarin Bru-te hruai kîr nana a hmalakna muanawm tak anga lang phênah hian Bru-te chu kutthlak a ni a, central sorkar hian Mizoram chhunga thil thleng chhui chiangtu tur committee din rawh se,' tihte a tel. 

Mizoram aṭanga Tripura lama chhuak ta Bru-te hi an lo kir lehna turin sorkar laipui leh Mizoram sorkarin vawi tam ruahmanna an siam tawh a, tun thlengin an lo la kir duh lo. Mizoram lam pawhin Mizoram mi na na na hi chu ṭha taka dawnsawn tumin hma a la a. Nimahsela chhuanlam hrang hrang an siam bakah phût belh an nei zel bawk a, tun ṭumah pawh hian a hlawm pui hi chuan an lo kir leh dawn lo a nih hmel. 

Bru pawl hrang hrangin tun hnaia Bru hmeichhe pakhat tualthihna an sawi lang tel hi a vanduai­thlak a, hnam leh hnam thil pawh ni lo, Bru leh Mizo inkar buaina pawh ni lo, nupa kara buaina thil thleng an tlangaupui duh a, Mizote min puh chhiatna remchanga an hmang lui ṭalh hi chu Mizote tan hriatthiam a harsa khawp ang. 

Bru-te hian Mizorama ṭha taka lo kir an duh lo a nih chuan Mizorama vote an neih hi phalsak tawh lo ila, inthlan dawna Bru vote duha intlawn siak ṭhin political party-te pawh hian an pawi khawih lenzia hi hre chhuak teh se. Remna zawng loa buaina leh buai belhchhahna zawng ang maia Bru-te an khawsa reng mai hi a hahthlak a, Mizo mipuite hian ṭha taka lawm harsa kan ti tawlh tawlh ang tih a hlauhawm ta.