Ai kal lak

Mizo Students' Union (MSU) chuan tun hnai khan General Conference vawi 18-na an hmang a; MSU hian, zirtirtu ai kal late zawn chhuah a, hrem an nih theih nana hmalak an rêl. 

Mizorama kan buaina lian ber chu sorkar hnathawk ai kal lak ching an awm hi a ni. School Education department hnuaiah ai kal la hi an tam ber awm e. Heng mite hi sorkar hnathawk ni reng si, sorkarin thawk tura a dahnaa awm duh loa hmun nuam zawka awma hlawh tlem zawka midang chhawr chhawn ching an ni a, hetianga tih hi sorkar dan bawhchhiatna lian tak a ni. 

Tun hnaia zirtirtu lak a ṭul chhan lian tak pakhat chu Mizoram sorkar sikula zirtirtu indaih loh lutuk vang lam niin, thiangtlang kilkhawr zawka zirtirtu indaih loh vang a ni. Zep nak emaw, khawpui hmun ṭhenkhatah chuan zirtirtu lamin ṭhahnemngai takin an zirlai tur an 'zawng khawm' hial tawh a, an sikul kharsak a nih mai hlauin zirtirtu hmun nuam zawka awmte chuan zirlai tur a zawnin an zawng tawh a ni. 

Hetihlai hian zir­tirtu ṭhenkhat mahni thawhna tur hmun kilkhawr deuh a nih vanga kal duh lo a, ai kal lak ching an awm hi a vanduaithlak hle. Sorkar hian a duhna hmunah a hnathawkte hi a dah thei hlawl lo a nih pawhin, ai kal lak ching tal hi chu a titawp ngei tur a ni. Tunah chuan zirlai pawl zawkin ai kal lak tihtawp tumin ṭan lak an rel ta hial a, engpawhnise hei hian rah ṭha chhuahin Mizoram sorkar hnuaia ai kal lak hi tawp tawh rawh se.