School Education minister ṭhahnemngaihna kha

Zirlai pawl Inkhawmpui a hmanpuinaah School Education minister Lalchhandama Ralte chuan, Mizoramin hma lam a pan zel theih nan khawtlang nu leh pate leh zirlaite an ṭan tlan vek a ngai tih sawiin, "Zirna hian kan society-ah hmun sang ber a chan a ngai. Zirna hmun ngaih pawimawh leh vawn zahawm kawngah te, zirtirtute inthlahdah leh inthlahdah lohah pawh khawtlang nu leh pate'n tun ai hian ngaihven ila, chu chuan kan ramah edu­cation revival a thlen dawn a ni," a ti. 

Mizoram mamawh lian tak chu zirna kawnga ṭhan harh a ni. Tun hmain Mizote hi zirna kawngah leh ram pum huap sorkar hna sang intihsiaknaah pawh kan duai lo hle ṭhin a, zirna in ṭha leh lehkhabu ṭha ber berte nei lo mah ila zahpuiawm lo takin kan awm ṭhin. India hmarchhaka tlang mite zingah phei chuan Mizote hi lehkha thiam thei leh hna ṭha thawk tura inziak tling thei tak kan lo ni tawh ṭhin. 

Tlemlai deuh aṭang khan Mizote hi zirna kawngah kan tlahniam hret hret niin a lang a, kan tlahniam a nih chiah loh pawhin kan ṭhenawmte ṭhan rualin kan ṭhang ve ta lo tih erawh kan pawm tlang ang. Hna sang thawk tura intihsiaknaah pawh Mizo hming a lang khat pharh a; tun hmaa kan ban phak ngai loh zirna in ṭha zawk leh lehkhabu ṭhate nei ve tawh mah ila, a mihring lamin kan zir ta meuh lo a ni mai thei. 

Zirna kawnga kan tlahniam ta deuha lang hi a chhan tam tak a awm thei ang a, kawng danga hma kan sawnnate erawh puh ngawt loh a ṭha ang. Tun hmaa kan lansarh lohna infiamnate leh inelna ṭhenkhata kan hlawhtlinnate hi 

ṭhen­khat chuan zirna kawnga kan tlak hniam chhanah an puh lek lek a, kawng khata hma kan sawn tak avanga zirna lama tlahniam chu kan nih hmel lo a, chhan tam tak a awm thei ang. 

Zirna kawnga hmasawn thar leh tur chuan kan zavaia kan ṭhanharh a, kan ṭan tlan a ngai. Chumi tura School Education minister ṭhahnemngaihna leh sawmna hi mipuiten hre reng ila. He hnam hian zirna hi tun aiin ngai pawimawh zual se, dinhmun sang zawk thleng turin zirnaah i kir leh ang u.