Kawngpui siam tihkhaihlak

Champhai District NGO Coordination Committee chuan thuchhuah siamin, Seling leh Champhai inkara National Highway No. 6 siam mêk chu tihkhawlhkham zawnga hma la lo turin mi tin an ngen a; national highway chu mahni khaw pal tlangtir kher tum zawnga hma la lo tura an duh thute pawh an ziak lang. 

Khaw tinin kan duh chu kan khúa ṭheuh paltlanga kawngpui ṭha tak neih hi a ni a, kawng­pui hian hma­sawnna leh awl­samna nasa tak a ken tel vang pawh a ni ngei ang. Kawng­pui tan tlang khúa chuan kawng tam takah hamṭhatna an nei a, an khaw tiatpui kawngpuiin a paltlang ve lohte aiin kawng tam takah an ṭhang chak zawk fo reng a ni.

Hetihlai hian Mizoram tlâng awm dante en hian tuna kawngpui kal dan pangngai aia ṭha zawk, tawi zawk leh zawh nuam zawka kawngpui siam theih dan hi a awm niin a lang. Tun hmaa khawl ṭha pawh a awm lohlaia a awlsam apiang zawnga kawngpui an siam ṭhin aia remchang zawk hi a awm nual tawh awm e. 

Hei vang hian hmasawnna ruhrel lian duan thar a nih hian tun hmaa mi ang diak diak chhui chhuah leh vek hi a remchang vek tawh ṭhin lo a; tuna sorkar laipui lamin Seling - Champhai kawngpui an siam thar turah pawh hian kawng hlui zawh leh a remchan lohna hmun pawh a awm thei ang. 

Champhai lam NGO-ten ngenna an siam hi mitinin zawm theih ni se a lawmawm a, Mizoram pumpui tana ṭha zawk tur ngaihtuah thiam hi kan inzir chhoh zel a ngai dawn hle a ni.